中環在線：奶月沽清半島登報耍冧 - 李華華
大酒店CEO郭敬文
賣月餅賣到警察到場調停，仲要因為一粒鐘火速售罄而登報道歉，真係只有半島酒店嘉麟樓嘅奶黃月餅先會搞成咁。撞啱經營半島酒店嘅大酒店(045)星期三公佈業績，睇怕行政總裁郭敬文除咗要睇熟盤數，仲要諗定點樣解釋月餅呢單嘢！
嘉麟樓奶黃月餅查實已經賣咗26年，好多企業同本地富豪每年都一百幾十盒咁訂嚟送禮，近年越嚟越紅，唔知同自由行有冇關，事關買嚟送禮除咗顯示花得起，仲係有味品嘅表現。
月餅前身係奶皇包
聽講製作嘉麟樓奶黃月餅嘅葉永華師傅，亦係嘉麟樓嘅開國功臣之一，嘉麟樓1986年開業佢已經入職，主要負責點心製作。當年月餅主要用蓮蓉做餡，但葉師傅發現食客好鍾意奶黃包，中秋將至，佢就忽發奇想，試吓用奶黃做月餅餡，第一年只係做咗2000盒，做到今年係6.5萬盒。
葉師傅今年已經預多咗產量，原本諗住可以預留一批，畀8至9月去嘉麟樓食中秋晚市套餐(每位888大元，至少4位)嘅食客，每枱送番一盒奶黃月餅，點知上星期四開賣一粒鐘賣曬，呢個送月餅優惠即刻煞停，換言之，今年買唔到嘅粉絲真係要明年請早嘞。
李華華
mailto:LiWaWa@AppleDaily.com
上一則: 淪為唯一「垃圾級」藍籌
下一則: 中環在線：中環人跨區捧浙江軒 - 李華華
中環在線 - 李華華 舊文
