施永青變財神益員工中環在線：中原爽派花紅 - 李華華
狼振英上場後成日話要解決市民置業問題，暫時睇唔到佢有乜良方妙藥，只知道樓價繼續係咁升，幾大地產代理講明要大肆擴充，中原地產噚日仲大派花紅，一班後勤員工第2季至少分到1.08個月花紅。後勤都分咁多，生意有幾好，唔使講啦。
半年派3個月花紅
中原後勤員工今年頭一季已經分到超過一個月花紅，第二季再分至少1.08個月，後勤管理層仲勁，同上季差唔多，分到1.62個月；換言之，半年已經分到2.17至3.26個月花紅。照咁計，如果樓市保持到個勢，中原班後勤今年全年隨時分到4至7個月花紅喎。
中原家陣有470位後勤員工，假設大部份人月薪一萬，管理層幾萬，淨係第二季花紅都派過千萬，老闆施永青確實豪爽。
派得豪皆因生意好，中原上季有8.97億生意，貢獻最大當然係一手新盤，將軍澳峻瀅、沙田溱岸8號呢類大盤好幫到手。中原工商舖又連續做咗荃灣英皇娛樂廣場同銅鑼灣前泉章居舖位兩單超過10億嘅大刁。
只可惜上半年中原加舖，又畀業主狂加租，影響到利潤，花紅係有，但無舊年上半年2.7至4.05個月咁多囉。
李華華
mailto:LiWaWa@AppleDaily.com
上一則: 需求穩大摩唱好江銅
下一則: 中環在線：張華峰雙管齊下拉票 - 李華華
中環在線 - 李華華 舊文
