金融High Tea——高PE股真正安全嗎？
2012年8月23日
■百麗中期純利22.4億元人民幣，同比升11.7%；期內營業額升15％，升幅多過純利。
港股昨日走勢唔係幾靚，有少少穿位向下的形態。內地股市午後跌勢轉急，上證綜指一度跌1％至全日低位2,097點，拖累港股向下，其後內地股市彈港股唔彈，仲要向下尋底，恒指收市報19,887點，跌212點，跌穿埋20天線，唯一好消息是成交只有396億。
藍籌股市以百麗國際(1880)跌得最多，大跌4.6％，收14.18元，主要因為業績並無驚喜。
百麗上日公佈中期業績，純利22.4億元人民幣，同比升11.7%；期內營業額升15％，升幅多過純利。
百麗增長放慢
證券界對百麗的評價都係一般，交銀國際認為，雖然百麗鞋類業務繼續成為動力，但運動服裝業務表現一般，令經營利潤率收窄0.7個百分點，降到17.5%。交銀國際認為，百麗仍是行業龍頭，但利潤率已見頂，加上估值偏高，維持中性評級，認為同業達芙妮(00210)的潛力更吸引。
高盛就認為，百麗面對經濟低潮，抗疫力好過同業，但就關注佢今季的同店銷售表現，及未來的促銷成本。花旗睇得較好，話百麗半年純利雖然稍遜該行預期，但已明顯跑贏同業，證明公司無論在市場觸角還是供應鏈管理都比較優勝，毛利率可維持穩定，繼續建議「買入」，目標價16元不變。
百麗近半年在12至16元中間走動，而家股價插咗啲，仍然有22.8倍歷史市盈率(PE)，遠比達芙妮的13.8倍歷史高盈率高。
市場俾得咁高PE百麗，係睇佢係內地行業龍頭地位，仲信佢有高純利增長(去年純利增長24%)，但佢公佈中期純利只增加12%，到底值唔值這種PE呢？
而家市場怕風險，資金愛泊在一些行業龍頭股，最好是屬一般消費類，估計佢哋的生意唔受經濟周期影響，所以一眾女鞋股、衞生巾股、紙巾股，都升到好貴，概念好似啱，但盈利增長一放慢時，馬上就顯現貴到無譜的問題。
講平蘋果最平
一般散戶唔識分平貴，只看股票價格，見到百麗14.18元一股，好似唔係好貴，我又舉個例，美國股王蘋果，蘋果現價折合5085港元一股，散戶會嘩一聲，但蘋果現價的歷史市盈率只是15.4倍，預期市盈率更僅有11倍，你話22.8倍PE的百麗貴，定係15.4倍的蘋果貴？講起蘋果，不少人覺得佢風光難永續，問題佢係有咁強的品牌，有iPhone、 iPad、 Mac機咁強的產品，即使花無百日紅，將來可能唔好，但點解而家PE會低過百麗，到底係百麗貴，定係蘋果平？
我有時覺得，好多基金話避險，但把錢泊在一些PE很高的股份去，這些高PE股真正安全嗎？ 相反有些股份PE好低，例如長實(001)，現價107.7元，歷史市盈率5.4倍(去年有部份特殊利潤因素)，有人話擔心樓價大跌影響到佢，但一來樓價未跌，二來長實係綜合企業，業務有一定分散性，乜咁低PE唔係代表已有安全系數嗎？
傳聞長實想分拆旗下的經營內地房產的基金管理公司ARA在新加坡上市，將成為當地首家人民幣上市股票，若然成事，對股價都有少少刺激。
總之話番轉頭，唔係話長實好好，我只係想講叫我把錢放入高PE但睇唔到產品有壟斷地位的公司「避險」，我就唔制啦。
陸羽仁
上一頁 下一頁
金融High Tea 舊文
