金融High Tea——阿爺郁手 硬扭敗局
2012年8月6日
■上證綜指要等到阿爺出招才反彈，上周五剛好又彈番上所謂鑽石底的2132點位置。新華社
歐美央行開會都無料到，原本擔心港股上周五會大調整，當日恒指低開132點後，急速向下尋底，最多跌241點，但之後就好似一個鑊仔咁彈番上來，最後差不多收復全部失地，只是微跌24點收場，應跌不跌，有可疑。
或者港股強勢和內地股市走強有關，上證綜指升1％，收2132點，內地升市有助港股氣氛，但一般而言如果港股只因內地而升，在下午三點內地收市後，港股都會回吐，但港股上周五在三點後不但沒有回吐，而且大幅向上，愈升愈有，不似單受內地股市影響。
插穿鑽石底再出招
中環茶友話，呢啲反常現象有幾個解釋，第一隻是短線行為，可能市場好多人因為歐美央行沒有料到而看淡，大戶反其道而行，乘勢夾淡倉。第二是外資大行收到風美國就業數據良好(結果上周五杜指因此大升217點)，搶先炒高港股等今天收割。第三是內地政策開始積極支持經濟及股市，外資亦慢慢轉向睇好紅色股，股市受支持向上。只要再睇本周走勢有無後勁就知，若只是炒偷步或夾淡倉，會十分短癮，但如果港股反覆向上，就要小心大市轉勢。
阿爺最近開始頻密出手救市救經濟，不過內地股市亦真係跌得好殘，本來不少內地評論家話上證綜指今年1月的低位2132點是「鑽石底」，唔會跌得穿，點知呢個只係「豆腐底」，在7月26日一隊就穿咗，7月31日(上周二)更跌至2100點的大位，創三年新低，當日唔知係唔係「國家隊」力撐，先至險守2100點大位唔穿。其後要等阿爺出招個市才反彈，上周五剛好又彈番上去所謂鑽石底的2132點位置。
其實上周內地都有重量級消息，不過近排阿爺出招救市好似阻唔到個市下跌，所以無乜人理。其中一個關鍵是中共中央政治局在上周三開會，對內地下半年經濟工作做了指示，政治局在會後指出，中國經濟發展面臨的國際環境仍然嚴峻，下半年要把「穩增長放在更加重要的位置」，關鍵是「更加重要」這四隻字。
中國國際經濟交流中心研究部副部長王軍解讀會議結果，認為從月度資料來看，中國經濟下行壓力還沒有穩住，政治局再次強調把穩增長放在更加重要的位置，也恰恰說明這一點。中央要繼續實施積極的財政政策和穩健的貨幣政策，加大結構性減稅政策力度，保持貨幣信貸平穩適度增長，扭轉經濟下行走勢。
大量出口術叫回購
中國始終係一個政策市，既然政治局話要把「穩增長放到更重要的位置」，自然要不斷出招，放水、減稅、加大投資，將陸續有來，唔掂搞到掂。但阿爺亦吸收2008年放水4萬億之後搞出高通脹的慘痛經驗，放得來不會以「火箭炮」形式一次過量地推出震撼政策，但市場見政府的救市政策「細眉細眼」，就唔多認同，無大反應。
不過，阿爺也不是當內地股市的跌市無到，溫總過去都講過會為股市連番下跌憂心到瞓唔着覺，急股民之所急，所以上證綜指插穿鑽石底， 又逼到阿爺出招救股市。過去17日都無一隻新股IPO批出，而家內地仲有739間企業排隊等審批上市，但證監會唔批，變相暫停新股上市，減少供應托市。個市仍然唔得，中國證監會在上周四收市後出招降低印花稅，宣佈由9月1日起股市收費標準再次大幅降低(較多印花稅下降兩成左右)。今次降費單是在今年餘下4個月生效，將令有關方面少收16億，若加入此前證監會已兩次降低收費，預計全年市場會少收155億元，並不是細數目。上周五內地股市上升1％，主要是受降徵費消息刺激。
阿爺托市十分出力，除了手術，口術也不少。上周二內地大市創新低當日，證監會深夜喊話，話股市恐慌性下跌，是非理性的，投資者應理性認識市場，切勿盲目跟風，以滬深300指數為代表的藍籌股已經具備很高的投資價值，股息率去年已高於標普500指數。不過唔好以為中國證監會呢次喊話好新鮮，早自去年12月15日，剛上任的中國證監會主席郭樹清已在公開亮相時指出，中國藍籌股是一個很好的投資對象，年度收益率可以達到百分之十幾，派息可以達到4、5厘。內地傳媒數過，自此中國證監會先後有11次喊話，提醒大家中國藍籌股的投資價值。另外中國證監會又叫上市公司，如市值跌穿資產淨值，公司應該回購股份。
紅色股受撐轉勢中
雖然中國證監會愈喊話股市愈跌，但我絕對不會認為中國政府無料到。大家唔好唔記得，中國仍是一個政府權力好大的國家，股市好多時是政策市，當股市好熱時，中國官員會話股市有泡沫，跟着不斷出招，股市最終都會搞番下來。如今剛好相反，中國官員為股市跌過龍而不安，佢亦會不斷出招，令個市止跌回升為止。不過投資者經歷過上次4萬億救市，對救市政策胃口好高，見唔到呢種類型政策唔開心，所以對阿爺的措施無乜反應，加上宏觀經濟數據未見底，企業還在發盈警，所以股市仍跌跌不休。
我有大膽假設，無論內地A股，還是香港的紅色股，正在見底中，未來一個月或許還要再回吐試一試低位，但卻在慢慢轉勢，由弱勢轉回強勢，關鍵是阿爺會不斷出招挺住經濟，當市場突然發現經濟已止住跌勢時，股市就會大幅反彈。
今年股市已差不多過了三分之二，買股票的人輸多贏少，我對股民有少少建議︰
第一，今年最壞的情況已經出現，經濟在轉勢，股市在轉勢，明年的情況唔知，起碼今年的壞行情已走得七七八八，想沽的人大部份已沽了，無乜貨可沽，你見跌市的日子成交少過升市的日子，就知道反彈時或許有人想走，但再跌就唔多人想沽。
第二，捱到今天咪咁易走。若你手上貨多，唔捱都捱咗咁耐，例如揸隻大股都跌咗四、五成，就無謂等到今日低位先至沽啦，守吓啦，否則沽咗個全年低位就真係黑個墨斗啦。
第三，見壞消息唔跌可揸。而家好多股份發盈警，公司亦開始公佈中期業績，若公司公佈倒退這些壞消息後，股價無乜點跌，甚至有少少反彈，係見壞消唔跌的現象，如果成交有番咁上下，更證明有人在低位吸貨，反而係揸貨訊號。
第四，短周期股可吼。建材股、低檔消費股將是轉勢較快的行業，或者起碼是炒轉勢較快的板塊。另一類是生產成本大降而生意不跌的行業，煤價大跌，但電價維持，令電廠業務快速扭轉，雖然電力股升咗唔少，但回調時仍可吸納睇中短線，因為到公佈中期業績時又會炒吓，不過記住見好要收。若電力股掂，下一波都會炒吓電廠股，即使未有咁快有大量真錢投入去起電廠，但如果市況向好，電力股炒風會吹埋去電廠股那邊。
陸羽仁
上一頁 下一頁
金融High Tea 舊文
