金融High Tea——當屯門樓貴過港島時
2012年9月12日
■財金界猛人表示，佢認為屯門樓賣到1.1萬元一呎，當屯門樓貴過港島樓時，樓市都開始癲。
港股相當硬淨，昨日內地股市回吐，港股都跟住跌，最低見過19659點，跌過168點，但兩點半後突然抽高，從低位上番200幾點，最後升30點收市，恒指收報19857點，大有美國聯儲局開會前唔肯跌之勢，不過成交唔大，只有445億。
地產股在尾市抽高，地產分類指數升近1％，有盤開的新地(016)連升兩日，昨日再升1.4％，收104.6元。不過唔夠恒地(012)厲害，接連兩日破頂，昨日1.7％，收50.9元，係大型地產股中第一隻升穿52周高位，四叔最近都有大盤開，趁住而家樓市氣氛，股價係正式開賣前炒上，所以有持貨者要睇住賣樓時間表嘞。
地產股追落後炒折讓
恒地股價較資產淨值折讓較大，有35％，即係炒落後，所以特別買佢。，如果潮流興炒落後，新世界(017)折讓仲大，昨日升1％收10元，股價較資產淨值折讓58.1％，股價亦未上一年新高。
地產股升有佢升的道理，唔知大家記唔記得，兩年前恒地賣半山盤天匯時，搞出亞洲最高呎價，搞到「煲呔曾」好唔老嚟，搵人查天匯的成交有無造假，搞到恒基好頭痕。自此發展商都驚驚地，唔敢開價開得太離譜，怕俾政府查，又怕惹來壓抑樓價措施。
兩年過去，換埋個上任前講到要打低樓價的新特首，樓價不止唔跌仲升，妙就妙在發展商開價愈來愈進取，好似天不怕地不怕咁款。例如屯門盤「瓏門」，平均呎價1.1萬元，比同區二手樓呎價貴一倍有多，真係同港島東太古城一樣價錢，你可能會話新樓和幾十年樓無得比，但我就話：「屯門樓喎？」我估兩年前屯門新樓開價1.1萬元，政府又話要出招打擊，而家好似無件事咁，發展商亦唔驚政府。猶記得今年3月特首選舉時，講到上手特首「煲呔曾」好似同發展商勾結得好勁咁，新盤都無咁癲，發展商仲幾驚政府；點解呢個新特首講到自己好似同發展商係死敵，發展商又完全唔驚佢呢？
昨日同財金界猛人食飯，佢認為屯門樓賣到1.1萬元一呎，當屯門樓貴過港島樓時，樓市都開始癲，佢話最近豪宅呎價已經無乜得升，只係升細價樓，樓市唔係幾健康，政府又好似無計咁，佢唔敢掂香港樓。
各走極端不會平靜
我問佢世界各地有乜地方可以買樓，佢反而話內地樓平咗唔少，一係去上海買最好的，一係買最平的，佢話在中山打開高爾夫球，在球場旁的樓盤才600元人仔一呎，一千呎先至60幾萬，再跌都有限啩(呢啲錢對佢嚟講只等如零用錢)，佢仲話將來港珠澳大橋通車後，由香港去中山只要一個半鐘，好正咁話。我對中山樓價乜認識，但以樓價計，一間中山樓只係屯門新盤一個廚房的樓價，咁點跌都輸唔死人。
財金界猛人話而家股市都好動盪，股票跌多升少，但都唔敢大注買貨，最大筆錢只是拿去買美國債券，收3厘息，叫做對抗吓通脹就算。從佢買債券或者買600元一呎中山樓，可見佢避險意識都好強喎。
最後講兩句大市，美國聯儲局將在周三、周四議息，我哋周五就知結果，在此之前，個市都好難跌落去，因為沽低咗怕俾聯儲局主席伯南克出招夾死，但大市未來都唔會停在現水平，只會各走極端，要麼上20500點，要麼就隊落19000點，買股要有避險意識呀。
陸羽仁
上一頁 下一頁
金融High Tea 舊文
