金融High Tea——日日出招托市上
2012年9月13日
■昨日講的地產股繼續炒，恒地炒起3.1％，收52.5元。資料圖片
昨日外圍升少少，港股大反應，恒指一開市就抽高，中間雖然略有回吐，但最後都升217點散場，收20075點，升幅有1.1％，成交上番504億。
經紀張班客仲係淡友為主，最近睇到日本政府買島，又話怕中國同日本打仗要沽貨。我話有人睇好有人睇淡唔出奇，但唔好因為怕打仗去沽貨，中國同日本都係大國，兩個大國打唔成㗎，日本政府買島，事前派晒人去北京同中國溝通，中國就派四艘海監船去釣島附近「執法」。內地多個大城市都「畀人」去示威，睇嚟中國呢啲抗議性反應，早已同日本打晒招呼，所以日本在釣島附近的保安廳船艦，亦無和中國海監船對峙，似係大家作吓狀就收皮的格局。要怕市跌，不如怕美國唔搞QE3啦。
咪望打仗爆煲
中環茶友話，美國聯儲局議息前夕，港股突破20000點大關，散戶唔係幾信，一見升就沽，反而係利好因素，而家無乜散戶敢買嘢，買親唔係基金就係大戶，睇住美國個市去炒，雖然聯儲局搞唔搞QE3仲未知，但香港個市作勢想向上炒，起碼夾到班散戶都信入市接貨為止。而內地政策面亦配合，阿爺不斷出招救市，向上炒唔係太怕出現香港炒高內地狂插的慘局。
溫總理亦口術手術齊出去托市。世界經濟論壇在天津召開，溫總在會上致詞，除了話中國今年可以達到7.5％經濟增長目標之外，佢話中國目前無論是貨幣還是財政方面，都有「充足的力量」去刺激經濟，並具體指出，「即使中國財政收入近兩個月下降，到7月底收支相比還有一萬億的餘額，我們歷年結餘的還有一千多億的穩定節解資金，並將適時地把它作為預調微調的措施以推動經濟穩定增長。」老外對溫總講呢一千億資金係乜冬冬不大清楚，只知阿爺打開口牌有神秘基金，必要時可以救市。
溫總去完論壇，昨日返北京主持召開國務院常務會議，在收市後公佈推出八大政策促進對外貿易，包括加快出口退稅進度，支援商業銀行努力擴大對小微企業的貿易融資，擴大出口信用保險規模和覆蓋面等。
中國三大經濟支柱係出口、投資和內需，中國接連在投資和出口領域出招，都係想傳出清楚訊息，話佢地會大力支持內地經濟，我估佢咁不斷出手，會鼓勵外國投資者撈番啲紅色股，起碼買番少少衰咗好耐的出口股。
炒內房要順勢
講起炒股，昨日講的地產股真係繼續炒，就嚟開盤的恒地(012)真係炒起3.1％，收52.5元，資產值折讓更大的新世界(017)更升3.4％收10.34元。中環茶友話係炒緊「管治失效」，當日好多人媽「煲呔曾」控制樓價不力，但市場還是相當怕他，地產股死氣沉沉。但「振英哥」就樓市出兩招無乜料到，自己又俾國民教育等一眾政治事件搞到一身蟻，睇怕立法會開鑼後，佢都舉步維艱，好難有效管治，唔趁亂炒吓地產股都對唔住佢啦。
阿爺不斷出招救市，內房股又郁郁吓，有讀者問起點睇恒大(3333)，我話佢自從俾老外研究公司唱衰狙擊後，股價略作反彈後一沉不起，另外亦同買樓唔係好爽有關。昨日兩大國營內房中國海外(688)和華潤置地(1109)都升，中海升1.6％，華潤置地升2.2％，但恒大唔郁無升跌。
個市升緊，係炒緊一個浪，到底炒三日還是炒三星期，無人會知，炒股講順勢，國營內房股財力雄厚，特別是中國海外今年賣樓好順，所以股價升極仲有，雖然略嫌已經升咗唔少，但只要大市得，順往個勢佢哋都得，比較易炒。買恒大係逆勢，雖然唔排除佢大上大落，但佢個勢較弱，風險較高，小注無妨，大注難博。
陸羽仁
上一頁 下一頁
金融High Tea 舊文
