金融High Tea——官股競爭輝
2012年11月27日
■多隻官股係咁升，市民荷包就係咁縮！ 資料圖片
上星期外圍高收，投資者本來睇緊指數會否突破兩萬二點，可惜港股高開之後，就見走勢未能跟上，之後全日窄幅上落。不過，個別股份就表現唔錯，內房、內需同個別藍籌都有升幅。
恒指成份股有19隻上升。瑞信指，百麗(1880)為內地零售股首選，提升其目標至17.5元。股價漲3.1％，報16.18元，高見16.46元，創逾一年新高，為升幅最大的藍籌股。
港鐵上市累升兩倍
昨日有多隻恒指成份股同內房股創一年新高，成為強勢板塊。新高藍籌受捧都係有專營成份的公司，包括煤氣(003)、港鐵(066)等。過去煤氣被視為半隻地產股，但自上蓋物業陸續落成，地產業務比重減輕。不過，近年內地旅客數目增多，加上新線落成，令到客運生意都好轉，今年客運收入上升毛利提高，上半年公司盈利58.6億元，跌33％，不過客運量回升令客運業務收入升6.8％。
政府分拆的官股，最威水係被人鬧得最勁的領匯，股價上市至今升了三倍，港鐵無咁犀利，該公司上市時間耐啲，又無被人鬧得咁勁，股價表現就冇領匯咁標青，但由二千年上市起計，股價由招股時的九元八角升上30.5元，都升咗兩倍。中環茶友講笑講，近年官股上市，先後有領匯、港鐵、盈富基金同一隻大家無留意的貿易通，結果被人鬧得最多的領匯升得最勁，無乜人鬧的盈富同貿易通，股價表現就無咁勁嘞。
茶友呢個觀察其實不無道理，因為官股被人鬧，皆因賺錢賺得多惹人眼紅，如果佢有寡頭經營優勢，呢個情況仲明顯。港鐵遲啲就同政府傾票價，茶友講笑，按照呢個邏輯，係咪如果議員唔鬧，就代表管理層去得唔夠盡，小股東就要鬧呢？
係幾隻藍籌股力托下，大市雖然唔可以突破22000點大關，午後由升轉跌，好彩幅度輕微，成交唔多。恒指收21862點，跌52點。成交只有463億元。
日前《紐約時報》指平保(2318)曾去信總理溫家寶反對分拆，之後總理家人入股，雖然報道指沒有證據總理涉及利益，平保就話相關報道斷章取義、扭曲事實，並對公司產生損失及不良影響，將會採取適當的法律措施。受消息影響，平保股價跌近1％，報58.75元。
炒醜股馬鋼中選
市場近日興搵醜股炒吓，股民估計鋼價今年前三季已經跌到殘，再下跌空間有限，加上國家已經增加投資，預期鋼鐵行業明年會好轉，於是鋼股又有人炒吓。
馬鋼(323)股價由9月初的底部回升至昨日的2.15元，兩個月急升超過43%，不過比起去年9月的4.85元，股價仍然少了五成半。投資者以為買咗隻大型鋼鐵股就好安全，幾年唔走望反彈，真係喊得一句句。
去年前三季度，內地鋼鐵企業盈利387億，今年同期已經出現淨虧損達55億元，行業虧損嚴峻。按照「十二五」規劃，中央目標在2015年，十大鋼企產量要提升至市場份額60%以上，上個月鋼鐵行業盈利狀況已有好轉，鋼鐵行業PMI報52.7，較上月大升9.2%，重上擴張區域。全行業大中型鋼企總體上扭虧為盈，利潤有13個億。中央今次要整肅行業，淘汰小型鋼鐵，馬鋼鞍鋼自然最得益，成為炒落後對象。
陸羽仁
上一頁 下一頁
金融High Tea 舊文
