金融High Tea——鐵底磨穿
2012年11月28日
中國證監會主席郭樹清上任以來，想方設法要扭轉中國股市走勢，推出超過70個改革及調整，幾乎三日一小變，但最終都係無功而回。歐美股市受歐債危機及「財政懸崖」困擾，股市近期仍能夠「嘭嘭聲」咁升，港股恒指由18000多點升了超過3000點。惟獨上證綜指每況愈下，昨日連2000點鐵底係多番拉鋸下都失守埋，真係悽涼。
郭樹清表示，「A股市場有8000萬投資者，涉及兩億多人，資本市場成為熱點話題，股民對股市的期待給我們很大的壓力。雖然我們不負責股票上漲和下跌，但是和發達國家不同，我國的監管機構需要承擔一定的責任。」阿爺似有將股市成敗得失攬上身，想出甚麼方法一洗市場頹風。
港匯轉強大市撐住
A股咁跌法，港股好難有運行。恒指昨日開局都幾威，高開108點，之後再升越22000點大關，高見22002點，無奈國企股下挫，恒指掉頭回落，好彩係港匯轉強，似乎有資金慢慢流入，一路頂到收市，收市微跌18點，報21884點，國企指數跌41點，造10528點，大市成交唔夠500億元。
港股頂得住，相信係市場投資氣氛唔錯有關，尤其係人保集團搞上市，目標集資超過30億美元，預計會成為今年來港股最大的IPO案例。
投資者對人保咁興奮，主要係有人保集團搵到包括中國國家電網、美國國際集團、法國再保險集團以及中國人壽等17家基石投資者。大家都在諗，咁多大企業支持，斷估都唔會衰得去邊。
不過有分析潑冷水，有大機構捧場，即使係有國企背景支持都唔保證一定贏硬。資料顯示，今年上市的陽光油砂(2012)、國電科環(1296)及華能新能源(958)，搵到中投，大唐發電(991)、中國電網撐場，一樣跌到七個一皮，華能新能源潛水54%，陽光油砂插40%，國電科環方亦跌近29%。
分析又指出，如果人保集團以下限3.42元定價，用內含值倍數計，定價還算吸引，如果以上限4.03元定價就偏貴。中環茶友就話，數據可以參考，但用相反理論分析，如果散戶踴躍，可能掛牌一湧上就散，如果散戶戶應麻麻，可能就好似隻翠華咁圍咗貨炒多陣。
信德(242)獲得花旗大力唱好，股價大幅炒高。今次炒上表面理由係有大行唱好，其中花旗指信德的南灣海岸項目將會獲得批准動工，有關項目佔信德每股價值高達1.41元，續評買入，目標價由3﹒65元大幅調高至4.75元。
澳門股受寵愛
中環茶友話，近日資金興趣炒吓澳門股。聖誕臨近，市面開始人頭湧湧，目測顯示好多商場都係旺丁不旺財，個場逼滿人，但店內郁手買嘢客人就普通，今年消費仲要觀望吓，相比下，澳門大時大節消費，似乎仲係好旺，至少澳門人唔會話遊客係「蝗蟲」，洗錢的消費者個心會舒服啲，故此要炒聖誕概念，都係澳門概念股穩陣啲。
至於信德突然爆上，大行公開講嘅理由係睇好南灣項目，但睇落唔似咁簡單。記得信德早前曾經供股，搞出供股黨大手超額認購的風波，似乎有人睇中呢家公司的潛在資產。信德除了係澳門最大綜合企業，同時仲擁有澳娛權益，具有策略性地位，加埋其他資產，屬於大件夾抵食，有貨在手者，無需因為急升就快手食胡。
陸羽仁
上一頁 下一頁
金融High Tea 舊文
