金融High Tea——城鎮化有排玩
2012年12月18日
■以中國13.7億人口計，若要達到發達國家80%城鎮化水平，還有4億人要由農村走向城鎮。新華社
■農村人變城鎮人點都會消耗大量水泥建材。新華社
阿爺的中央經濟工作會議上周日閉幕，內地股市上周五大升後，昨日借餘力再升0.5%，但港股則力盡回落92點，跌0.4%。中央經濟工作會議表面上無澎澎聲的好消息宣佈，令股市回軟。
中央經濟工作會議強調中國經濟要「穩增長、轉方式、調結構」。外界最關心的貨幣政策，會議決定要「適當擴大社會融資總規模，保持貸款適度增加。」原本有擔心中央因為憂慮全球熱錢橫流推高通脹，唔會再泵水入市刺激經濟，但會議口氣寬鬆，估計來年都會酌量放水，但樓市的調控政策卻仍然無鬆口。
內地媒體從中央經濟工作會議理出四條受益主線：擴大內需、城鎮化建設、發展農業、改革稅制。我認為城鎮化建設係當中重中之重，歐美經濟唔得出口放慢，成本上升，好多人擔心中國未來需求不足，但唔講大家唔知，城鎮化可以帶來大量需求。
水泥建材 回吐低吸
?家中國城鎮化率基本在51%左右(住在城鎮人口比率)，不但比不上發達國家的80%，與其他新興國家比較也明顯偏低，人均收入與中國接近的馬來西亞、菲律賓等國城鎮化率也在60%以上，根據國際經驗，城鎮化率達到70%才會放慢，以中國13.7億人口計，若要達到發達國家80%城鎮化水平，還有4億人要由農村走向城鎮。
中國城鎮化率每增加1個百分點，會帶來7萬億元市場需求，大大提升基礎設施、公共服務設施以及住房建設的投資需求。
若中國每年提升1%城鎮化率，還有10年才達到其他新興市場的水平，29年才達到西方水平，可以話「有排玩」。
好直覺咁睇，農村人變城鎮人，乜都唔用都要消耗大量水泥建材啦，其次就係房屋、家電、基層消費品，記住唔係高端，係中低端市場。無怪乎水泥建材股近排咁強，不過要留意，佢哋近日亦都升唔少，如安徽海螺(914)、中國建材(3323)之類，想買都唔好馬上撲入去，等佢回番咁上吓先好入，佢哋走緊一條上升軌，反覆向上，等回落咗買入，再上穿高位時，有番10幾巴仙收穫又可以沽出食吓胡。內房股都係咁，今年本來唔係幾利做三四線城市的內房股，但到城鎮化動力加大時(可能要半年一年)，將來會對做三四線城市的內房股有利。
高盛睇好增長股
到年底人人用水晶球測市時。高盛亞洲及香港策略師劉勁津昨日發報告，話環球和中國經濟見底，主力資金明年會由債轉股，由高息股轉投增長股。本港股市勢將受惠，但估計明年下半年會好快，走勢呈先低後高格局。他預測明年恒指和國指會分別升至25000點及12500點，較現時仍有超過10%的上升空間。現時市面上的ETF(交易所上市基金)有好多選擇，資金由債轉股十分簡單，唔想揀股，買跟指數走的ETF，連個股分析的工夫都可以慳番。
股票方面，劉勁津指不少高息股，估值都已漸貴，增長股明年將可跑贏市場。佢話「有本港高息股，現時的股息率只有約3厘，開人民幣戶口都隨時3.2厘、3.3厘。」今年恒指雖然升了超過10%，但期間波動頗大，投資者唔係咁易捕捉得到。劉勁津預計港股短線仍面對內地政策未明，及美國財政懸崖的不明朗因素，繼續波動。
我就覺得今年股市美國好內地差，明年或者調番轉，若美國唔好時，點都影響香港投資氣氛，但我都認為要轉投增長股，此乃市場風向，博走一轉也。
陸羽仁
上一頁 下一頁
金融High Tea 舊文
