金融High Tea——揸弱股要知足
2013年1月8日
■免補地價居屋接受申請，令物業代理多了幾千宗生意，可補助水靜鵝飛私樓市場。資料圖片
昨日港股近乎無升跌，全靠中港兩地地產股撐住個市，恒生地產分類指數升1.5%，遠遠拋離大市。個市唔升唔跌，有小小原地整固味道，但成交仍然有812億，買盤仍然熱烈。
股市升勢擴散，開始去到較弱勢的股份，地產代理股就屬於呢類，美聯集團(1200)表現強勁，升超過5%至4.15元。
5000個免補地價居屋名額開始接受申請，等如物業代理今年多了幾千宗生意，可以補助一下近乎水靜鵝飛的私樓市場，加上上個周末有65宗新盤成交，按周上升約六成(可見對上一星期的基數幾低)，地產代理股即時炒番轉，玩吓「死貓彈」。
內房紅火 一唱就升
長實主席李超人預料樓價上下波幅介乎10%，市場相信樓市未死得，遲早會郁番。長實(001)長沙灣「一號．西九龍」及信置(083)「天賦海灣」錄得零星交易，最旺場的是恒地(012)及新世界(017)合作的元朗「尚悅」，兩日賣出25伙。老實講，單睇成交數字咁少，真係無驚喜，不過而家係炒信心，估樓市過一排又無事，所以長實、恒地及新地(016)皆漲超過2%，加埋九倉(004)、太古A(019)、會德豐(020)齊創52周新高，佢哋股價已反映咗市場對樓市的睇法。
內房股一如我早前預計，比本地地產股更強，包括花旗及德銀等多家大行近日齊齊唱好內房股。
花旗首選華潤置地(1109)及中國海外(688)，其次為值博率較佳兼基調校好的融創(1918)、遠地(3377)及合生(754)。德銀則首選富力(2777)、合景(1813)、中渝(1224)、佳兆業(1638)、融創及五礦建設(230) 等。昨日小型內房股升得仲癲！花旗點名的五礦建設及中渝都大幅抽高12%。
股市繼續升，一波波蔓延開去，由強股升到弱股，由弱股升到超弱股，揸住弱股見佢哋升自然高興，但要小心判斷隻股的業績係唔係在今年可以翻身，定係有排都未得，我一直對航運股有戒心，因為聽業界大佬講過佢哋行業周期長，航運股遠遠未過寒冬，你信晒基本因素乜股都唔使炒，呢排航運股跟住大市升，連帶造船股都彈，好似鎔盛(1101)再升5%，總之跟炒要留神。
入價減倉 穩陣為先
早前跌到好傷的太陽能股近日亦發力，阿爺自己出政策支持太陽能業，加上股神巴菲特又在美國投資太陽能發電廠，搞到光伏太陽能股熱熱地，隻龍頭股保利協鑫(3800)近排升唔少，昨日再升8％，真係升到停不了。
要將太陽能股和造船股比較，真係好似蘋果同橙一樣，好難比較，夾硬比我會估太陽能股業績復甦會快過造船股，阿爺在內地大力投資太陽能發電，會慢慢補到啲數。我唔係想講太陽能股好啲，係想講如果有網友買咗弱股，坐到今天若浮咗上水面，要打醒十二分精神，唔好一面倒睇好，要明白好多股真正要業績大翻身要較長時間，上水面後要留神。
網友Myself買保利協鑫成本價係1.87元，佢話上水面後會定番呢個價做止蝕價，我認為絕對唔妨，而家環球經濟情況不明朗因素太多，前景不易估，保守啲唔妨。若你1.4元、1.6元買保利協鑫，止蝕價可以低啲，但入價愈貴者，愈要小心，有時揸股唔止睇隻股，仲要考慮埋自己成本價平唔平。我成日都話，做人要知足，萬一沽早咗個市好旺，到時仲有好多股可以炒喎。
陸羽仁
上一頁 下一頁
金融High Tea 舊文
