金融High Tea——天要下雨
2013年2月6日
■西班牙首相拉霍伊涉貪污、加上意大利大選，歐洲政局現暗湧，累「九唔搭八」的港股跌到四腳朝天。新華社
■有傳政府擬仿效新加坡，提高外國人的買樓印花稅(由１０％升至１５％)，其實都少少搵來溝的味道。
股市要跌的時候，總會搵到理由。西班牙首相涉貪污、意大利大選，歐洲政局現暗湧，歐股急插，但與歐洲最密切的美股，跌幅唔係好勁，只係跌約1%，反而有些「九唔搭八」的港股就跌到四腳朝天，小投資者輸到一頸血。
恒指昨日全日一蹶不振，一度跌接近600點，收市跌536點至23148點；國企指數表現仲衰，跌343點，造11813點，跌幅2.8%。大市成交878億元，沽壓唔細。妙就妙在一直左右港股走勢的內地股市昨日不跌反升0.2%，同樣阻唔到港股急插。
經紀張昨日反應好有趣，一開始見跌兩三百點時話唔應該跌，既然前日無跟美股升，昨日唔應該跟美股跌，仲想走去揸，我都忍唔住㩒住佢。
散戶由唔信變信
好啦，到下晝愈跌愈有時，經紀張又變啦，變成大淡友，話呢種市隨時跌多二三千點，仲話有個客想買內銀股長揸，佢都叫個客唔好買。我又話佢，點解你變得咁快㗎？無人知後市跌夠未，你阻住啲客發達，萬一個市升番佢實媽你。
港股升咗咁多，跌吓好正常，正常到如天要下雨、娘要嫁人一樣，只能由她去吧，有得升，自然有得跌。港股近日外圍升唔肯跟足，到24000點前又好窒，都係想調整的先兆，下跌的理由係乜都唔太重要，重要的是要觀察是調整還是轉勢。
昨日所有板塊見紅，跌得最甘係金融股同地產股，地產分類指數跌超過2.8%。地產股借勢踩低的理由最易入信，樓價咁貴，政府去年底推出雙辣招，樓市靜了一段短時間，1月份又郁番，土地註冊處統計顯示，1月住宅樓宇買賣合約按月及按年分別升65.2%及54.8%，合約總值按月及按年分別升66.3%及28.6%，加上金管局陳總又唱淡香港人借貸比率高，市場怕政府再出招都好正常。
銀行按揭方面，經絡按揭首席經濟分析師劉圓圓表示，政府連環出招後，投資者轉攻車位及商舖，商舖買賣錄得顯著增長。
高盛仍睇好內銀
住宅成交量回升，但地產股不升反跌，傳傳吓又話怕好似新加坡上月中那樣，提高外國人的買樓印花稅(由10%升至15%)，另外將短期轉讓稅由住宅擴展至工商物業。新加坡的新措施已實行咗半個月，只是在跌市至傳香港會學新加坡加碼，有少少搵來講的味道。本地地產股全線向下，跌2至3%，新世界(017)及九倉(004)插超過4%。
內銀股跌勢慘烈，四大行跌2至3%，有傳中國銀監會見大銀行1月放貸增長太快，約見大行老總照肺，新華社已出稿否認，內銀股照插。高盛話內銀股可以趁低吸納。瑞信亦指出，內地信貸增長已加快，加上息口偏低，內銀出現爆破的風險不高，要留意的是，若經濟周期逆轉，息率高企的同時，內地出口仍沒改善，則有機會加大影子銀行爆破風險。
股市高位回落，若早前入貨只為短炒的讀者，宜守10%止蝕，到位要打靶都唔好手軟。
陸羽仁
上一頁 下一頁
金融High Tea 舊文
