假期結朿
2013/3/20 上午 09:33:18
網誌分類: 經濟
如果塞蒲路斯危機意味著過去半年歐債災難的「假期」結朿，是「新學期」的開端，我們都希望開個好頭，希望這個學期容易一點過去。昨日塞蒲路斯國會否決了修訂後的「打荷包」方案，否決向銀行存戶徵特別稅，但歐元集團無「發爛渣」，仍然俾時間塞蒲路斯去解決問題，暫時穩定了市場的情緒。
美國2月份新屋開建數字攀升0.8%，按年計達到91.7萬套，營建許可證增長4.6%，好過市場預期。受利好經濟數據推動，美股朝早造好，杜指朝早升62點。塞浦路斯議會開始商議備受爭議的銀行存款稅，美股開始掉頭回落，一路跌至塞浦路斯議會否決了存款稅議案才反彈。歐元集團態度友善，杜指最終收復所有失地，微升4點收場，造14456點；標普500指數跌4點，報1548點。
塞浦路斯政府臨表決前修改議案，改為存款超過2萬歐元才需要徵稅。但議案仍遭到國會以大比數否決。塞浦路斯正面臨一個兩難的死結，市場謠傳塞浦路斯財政部長已經劈炮唔撈，也好容易理解，國會唔通過當地銀行唯一的集資方法，塞浦路斯將得唔到歐盟100億歐元的緊急貸款，塞浦路斯銀行業將難逃違約崩潰的命運。如果議案批准通，後果一樣咁嚴重，—向被認為神聖不可侵犯(sanctity)的銀行存款，竟忽然被抽水最多近一成，存戶唔作反至奇。更恐怖的是全世界的人還有人敢膽存錢入歐洲問題國家的銀行？唔馬上提走所有存款自保？整個歐洲金融體系都會受到巨大衝擊。
塞浦路斯政府和歐元集團居然諗出此怪招，除了走頭無路之外，當中也有些少玄機，原本塞浦路斯銀行向來都係外國資金的避稅港。該國的銀行存款總值最高時相等於全國生產總值的8倍，而家估計跌到4.5倍。(美國的銀行存款大約等如有全國生產總值。)大部份的存款都來自外國，而俄羅斯資金又佔了大部份，全部是大額存款，所以塞浦路斯政府要「打荷包」的對象其實主要唔係國民，而係北極熊。唔排除塞國先推一個所有存戶都徵稅的方案，明知民眾會反對，然後順水推舟推一個主要針對10萬歐元以上存戶的方案，明搵俄羅斯人和當地富人笨。
德國顯然是這個打荷包方案的主要推手，表面上的理由是塞國如果借足170億歐元其負債對GDP的比率過高，所以歐元集團只可以借100億，其餘70億要佢自己打銀行存戶主意。深一層的理由是德國一向堅持受助國要行緊縮政策，你塞國政府細緊縮作用唔大，咪搵好大的銀行存款池開刀囉。最深層的理由是德國唔認為要佢出錢去津貼俄羅斯的逃稅存戶，有問題點解唔由俄羅斯人幫手埋單。唔好忘記而家德國總理默克爾係前東德人，德國有一半選民係前東德人，佢地好憎俄國人。
塞蒲路斯要諗新方案，要麼係一個修訂後的抽存款稅方案，另一個可能是向俄羅斯貸那70億歐元，不過此舉仍然會令塞國的借貸對GDP比例過高，國際貨幣基金會有可能反對。
塞浦路斯現時的困局同希臘差唔多，自己無可能解決得了，唯有拼命搵外援拯救，救唔到就要脫離歐元，以暫停還款和貨幣大貶值告終，咁就成為歐元的第一滴血，影響深遠。我們脫離歐債陰影的半年假期完結，而家又要玩?歐洲風雨。
美國聯儲局公開市場委員會(FOMC) 昨日開始了為期兩天的議息會議。市場都在密切注意聯儲局的會在什麼情況下加息或停止買債。而分析普遍認為，歐洲債務危機又再浮現，中國面對嚴峻通脹，可能收緊流通，聯儲局不會提前放緩或終止其特別寬鬆的貨幣政策。
陸羽仁
回應(6) 我想回應
陸羽仁 BLOG 舊文
