金融High Tea——穩紥穩炒
2013年3月11日
在港股牛牛皮皮幾日，到上周五就發力上，內地公佈2月進出口數據勝預期，日圓回落令日股大升，港股亦炒上，全日升320點，收23091點，成交升番上721億，期指又由大低水幾十點變番高水，大市氣氛有改善。港股都好有性格，早兩日美股創新高，A股急漲，港股亦只係微升，但上周五突然大漲，或許和外資買番少少港股炒吓落後有關。
講起落後，港股真係幾落後，美股杜指上周五又升67點，日日創新高，杜指今年累積已升了9.9%。而改弦更張搞量寬的日本仲勁，日股今年至今已大升18.2%；歐洲方面，德、法、英股市亦漲4.9%、5.5%及9.9%；至於港股就非常「藥水」，今年至今僅升1.9%，主要受內地拖累，上證綜指亦只升2.2%，遠遠落後於西方同日本的牛市。
其實歐美日股市大升，同央行大印銀紙大力放水有關，本來股市唔掂的日本，一加入大印銀紙行列，新政府要換走反對放水的日本央行行行長白川方明，日圓應放水之聲大跌，股市就走上大升之路。而內地剛相反，歐美日大水湧到，內地嚴陣佈防，一派收水格局，自然不利股市。
內地通脹 又見三字
我上星期一講到內地通脹有上升的擔憂，話口未完就開口中。上周六國家統計局公佈2月份通脹率(CPI)按年升3.2%，創10個月新高，比市場預料升3%更高，1月份通脹率只是2%，內地通脹轉眼進入3字時代。
國家統計局努力唱好通脹受控，統計局城市司高級統計師余秋梅解讀2月通脹數據時話， 2月份3.2%的CPI按年升幅可能會是近期的一個高點，近期物價大幅度上升的可能性不大。余秋梅話，進入3月份以來，由於農曆年影響消失，氣溫逐漸升高，天氣好轉，有利於蔬菜等鮮活農產品的生產和運輸，鮮活農產品價格短期內大幅度上升的可能性較小，3月份CPI升幅可能會回落。只要各地繼續保障重要商品供給，進一步搞活流通、降低物流成本和加強市場價格監管，可以保持物價總水準的基本穩定。
但經濟學者馬光遠對下半年通脹有擔憂，認為通脹上升的核心的原因，是穩增長背後投放的過多貨幣。而2月份通脹中，食品價格按年上升6%，影響CPI上升約1.98個百分點，即係話2月通脹有60%由食品加價貢獻。雖然2月份豬肉價格比去年同期下降1%，但比1月卻上升1.5%，所以「豬哥哥快發威了」，今年的通脹形勢不容樂觀。另外，2月26日內地上調成品油價格，對2、3月份CPI形成上升壓力。
控制M2 減少放水
阿爺亦深怕自己支持經濟投放太多貨幣，再加外國放水的影響，會令通脹失控，所以在定出今年工作目標時，已悄悄加力控制。溫總在剛召開的人大提交本屆政府最後一份工作報告中提出，2013年中國GDP增長預期目標為7.5%，以及通脹率(CPI)升幅為3.5%。GDP增長目標與2012年目標持平，而通脹率3.5%則低於去年4%的目標。GDP目標不變，但繼續調低的物價上升目標，可以解讀為樂觀，亦可以解讀為中央認為未來通脹壓力依然大，要調低目標去控制。
我傾向相信中央懼怕通脹，主要因為國務院調低了貨幣供應(M2)的目標。溫總在政府工作報告中提出今年M2增長目標只有13%，比去年的目標14%，低了1個百分點。去年M2實際增長為13.8%，即今年的目標亦比去年實數低。貨幣供應的邏輯是適應經濟增長加通脹的貨幣流通需求，所以是以經濟增長率加通脹率再加一個上浮數目，定出M2指標。今年經濟增長目標和去年相同，通脹率目標比去年低0.5個百分點，按理M2下調0.5個百分點是相應安排，如今下調1個百分點就是從緊，被市場看作限制借貸和流動資金訊號，內地股市唔係一定唔升，但好難大炒特炒。
結論只有一個，歐美日水頭從寬，內地水頭從緊，若西方是牛市向上，內地股市跟進都要打大折扣。香港亦差唔多，人地大升，我地小升。到人地回落時，我地當然會跌。
近二萬四 可以減倉
名嘴曹仁超早前睇恒指今年見27000點，最近已改口，話只會在22000點至24000點中間上落。千萬不要以為我覺得他改目標有問題，內地和香港股市勢弱，唔改口先至有問題。今年港股睇兩大因素︰美國復甦與內地通脹，若美國持續溫和復甦，但就業又無急速上升，美股可以反覆向好；若復甦無力，又或者失業率急跌令聯儲局可能提前收水，皆可令美股見頂回落。反觀內地，若經濟良好通脹溫和，股市可持續造好，反而若通脹升得太快，阿爺收水，股市有壓力。要我估，就估較大機會是美股反覆向好，但內地收水利淡，所以港股雖然未似會急跌，但亦難大升，所以升到近24000點附近又可以減啲貨啦，去到25000點都幾盡。由於阿爺下半年通脹會升，小心今年股市和去年相反，去年前低後高，今年怕會前高後低。
若假設今年內地仍是水頭較緊張的市道，不是大放水大炒作的市道，但美股短線繼續破頂向上，港股踏入3月也是炒業績的高峰期，若過早看淡，也會中招，不如穩紥穩炒，基調求穩，順勢短炒，不望食大茶飯，但求兩餐溫飽，有得食就食啦。
市場水乾 短炒業績
周末和中環茶友飲茶，講到目前「炒又怕跌，唔炒又怕升」的困局，得出「順勢短炒」的結論。以和黃(013)做例子，話佢年年2、3月公布業績前都炒上，但隨後多數有較深回落，好少直線向上。?家唔炒，可能錯過10%升幅，但揸咗唔走，又可能捱20、30%的回吐。
睇吓和黃過去4年個圖，2009年年頭係大跌市，是和黃3月公布業績都唔升的唯一例外，當年3月佢反而跟大市走到30幾元的低位，但當年大市在3月見底後急彈，到5月和黃都彈番上58元，但已見一年高位，之後插番去48元(跌17%)，然後在50至58元之間上上落落，即係5月急升時沽咗無壞。在2010年和黃於3月去到59元，6月回到48元(回落19%)，不過當年大市全年向上，到11月和黃升上88元高位。
到2011年，大市走勢相反，和黃在3月升上93元高位，但當年係大跌市，9月跌番到56元低位(回落40%)。到2012年，和黃在3月升上80元高位，但5月已插番到63元(跌21%)，然後在年尾上番80元(見圖)。
睇吓和黃的例子，除了2009年年頭大跌市的例外，其餘3年佢在年頭2、3月出業績前升一浸已會見高位，然後在5、6月回落，跌17至20%閒閒地。遇上好年頭，和黃下半年升得高過上半年(2010年)；遇上壞年頭，年初已見頂，下半年上唔番高位(2011年)。
結論係，既然未睇到港股今年有大牛市，買和黃(或其他大股)炒業績，2、3月見高位就要走，唔使等收息，然後等回吐揸番(進取者高位低15%可以開始買，保守啲等到9月睇吓有無大插至買)，若摸到低位入市，等到明年初賺20%唔難。若是大牛市，死揸等佢大升都得，但若唔係睇得咁樂觀，沽吓都無壞。其他大股，都可以利用業績好沽貨套吓利。
陸羽仁
上一頁 下一頁
金融High Tea 舊文
