金融High Tea——任散戶睇底牌
2013年4月11日
■李超人上星期郁手，入市增持長和，持好倉升至52.45%。資料圖片
美企開始季度業績公佈期，打頭陣的美國鋁業盈利好過市場預期，投資者情緒樂觀，歐美股市造好，杜指再創歷史新高。港股跟隨造好，延續上日反彈勢頭。恒指高開後受內地A股轉弱拖累，中午打回原形。午後A股回穩，恒指再度發力，大幅抽上近180點，以全日最高位收市，收22034點，漲164點。國企指數漲83點，報10694點。大市成交593億元。
港股午後大翻身，除了受李超人增持系內股份和有望入股意大利電訊的消息帶動外，亦受大連萬達買殼上市刺激，引起瘋炒借殼的恒力有關。
今次萬達商業地產透過向公司主席陳長偉購入舊股以及其持有的可換債，以取得公司65%股權，總作價6.74億元。股份每股作價為0.25元，較公司停牌前折讓27.5%。完成後萬達將成為公司控股股東，而陳長偉於公司的持股量則降至9.98%。由於收購股本達65%，公司將會提出強制性現金收購，每股現金作價0.334元。
萬達締造淡市神話
萬達商業地產由大連萬達擁有約53%。大連萬達創辦人王健林喺《福布斯》中國富豪榜排第二位，被視為最具實力的內房發展商，據報資產高達2000億元人仔。萬達在港借殼上市，隨即惹來市場瘋炒。恒力停牌前股價0.345元，昨午復市，高開1元，隨即炒至最高的2.44元，之後升幅收窄，收市報1.95元，較停牌前股價暴漲超過4.5倍，成為淡市神話。
另一利好消息係藍籌公佈業績後，華資地產商老闆先後入市增持股份，其中包括長實集團李嘉誠。李超人喺業績公佈時，被人問起點解好似無回購呢？佢笑言因為支持細仔投資，已經用咗百幾億銀。不過，上個星期佢就郁手，入市增持長和，其中以每股112.735元增持，持好倉升至43.33%；同日以每股平均價79.653元增持和黃，持好倉升至52.45%，合共斥資1.06億元。資料披露後，長和系股份昨日應聲彈高。和黃抽高4.2%至82元，係表現第二好的藍籌股；同系長實漲1.7%至114元。
除了李超人外，恒基四叔李兆基都密密手入市增持。恒基早前業績表示，派息外仲宣佈派紅股，呢種做法係大型地產股近年相當少見，四叔似乎係覺得自己隻股偏低，與其投資其他公司，不如買番自己隻股份。
短炒要盡量走位
大股東增持股份，係代表覺得長線抵買，咁散戶係咪跟得過呢？中環茶友話呢樣嘢要配合埋客觀環境去睇，若然個市氣氛好，多咗大股東一份購買力，自然如順水推舟，假如大市氣氛唔係咁好，大股東入市，就發揮護價作用，但未必咁易大幅推高股價，想跟住落注，穩陣方法係候低吸納。
茶友話，早年華資大戶入市，係好清楚買貨的訊號，當時港股市值細，落場玩家相對少，資金流容易控制，家港股已經係國際級數，落場有中資、美資、歐資，仲有投行用埋衍生工具嚟舞高弄低，大股東入市係其中一個參考訊號，但若然係短炒，仲要睇埋其他外圍因素。作為老散，勝在走位靈活，呢隻股唔買可以買其他，當個市唔係旺到哄哄聲，見到大股東出手，等如睇咗半隻底牌，假若有機會等到買得平過大股東，咁係咪勝算仲高先？
陸羽仁
上一頁 下一頁
金融High Tea 舊文
