金融High Tea——難炒變盲炒
2013年5月6日
上星期五美股升、A股升、港股唔想升，恒指只升21點。收市後美國勞工市場傳來喜訊，美國4月份失業率意外下跌0.1個百分點，跌至7.5%，是2008年12月以來低位；4月非農業新增職位更上升至16.5萬，好過預期的14萬。美股全線上升，杜指最多曾升176點，高見15008點，收14973點，升142點，升1%。標普500指數亦升破1600關，收1614點，美股稍為回氣又創歷史新高。
港股在美國的預託證券亦升近23000點大關，收22938點，要睇吓今日香港個市係唔係又再虎頭蛇尾啦！
美股強，港股弱，樓市又被政府打殘咗，變成炒乜都唔係幾得的悶局，唔止散戶係咁，由金管局負責投資的外匯基金都係咁。外匯基金派發今年首季成績表，多項投資不是虧損，就是僅錄得微利，只有海外股票投資大賺249億元，撐起外匯基金首季成績，期內投資整體獲利171億元，按年跌近62%，按季則跌約44%，都唔係幾靚仔。
外匯基金 投資困局
逐樣去睇外匯基金投資表現，外匯投資最差，首因美元走強而勁蝕98億元，上次出現季度虧損係去年第二季。債券投資方面，外匯基金首季的債券部份只錄得28億元收益，相信因為美債價格在高位無乜上落所致。至於炒股只有海外股票得，主要因為美、日股大升，金管局首季海外股票投資賺249億元，雖然按季上升近1.4倍，但仍唔夠去年同期咁好，按年跌12%。而港股投資則錄得14億元虧蝕。
睇番外匯基金去年賺1086億港元(回報4.4%)，主要受股票投資賺733億帶動，當中包括307億來自港股投資。今季港股PK，加上美債升到高位又唔再上，就令外匯基金投資收益大縮水，今年睇怕都好難追到去年的業績。而再對上一年即2011年外匯基金的全年投資收益只有271億港元(回報1.1%)，希望今年埋單時唔會咁衰啦。
外匯基金體積大，投資限制多，大量資金放美債，存外匯就係歐羅、日圓呢啲大貨幣，所以美債大升時對佢最有利。今年首季美債不升，美元強，對佢比較不利，再加上本地股市唔得，回報更受限制。
從金管局的處境，都睇到散戶的狀況，炒港股唔多妥。美股日股升唔關自己事，港股人升佢唔升，指數頂住，但好多股都回到阿媽都唔認得。你睇大市好似從今年高位唔係回咗好多，高位近24000點，家升近23000點，好似同高位唔係差好遠，但主要係隻匯控(005)頂住，佢走勢特別勁，家85.25元，距離高位88.45元，只差3.6%，但你睇恒指，距離高位已有5.2%，睇國企指數仲衰，距離高位有12.5%，換句話說，如果你唔係揸住匯控，係揸住國企，指數好睇，你唔多受惠。市唔好，大多數人炒股無乜得着數。
樓股低迷 盲炒金飾
港股積弱的原因是資金湧向炒美股日股甚至歐股，唔炒新興市場，因為西方市場因為經濟唔好而放水，相反地新興市場怕通脹久不久要收水，這是基本因素。附加因素是中國經濟的確放慢，估計中國領導短期內會接受經濟放緩的現實，不會急於出招，等到今年下半年睇睇環境再算。若然如此，本地和中國消息傾向負面，資金流向傾向負面，只有美股破高叫做利好環球市場，港股在此種境況下，還是有反彈，無大升，股票繼續難炒。
我同中環茶友們講起炒股難現象，有茶友認為，由於難炒，更易盲炒，上周內地《人民日報》就作了長篇報道，解釋內地人見金價跌就搶買金飾的原因。內地家存款利息低於通脹，放錢在銀行受通脹侵蝕，樓市受壓，股市又低迷，人民有錢無地方投資，所以走去搶購金飾。
又有茶友提起，聽內地芬佬講起，唔好睇內地個市牛牛皮皮，其實大市唔郁，大戶將不同股份輪住炒，都搵到餐食。不過大戶有得食，就等如散戶俾人食啦。
我搭句口話，內地特別喜歡炒作這個「板塊」，那個「板塊」，主要亦因為有大戶資金輪流炒所致。這些「板塊」炒作表面上看因為某些政策觸發，實際上內地政策出台前，經過這麼多環節，有好多內線人士可以同大戶配合，政策出台前大戶搶先入，到政策真正出台時大手掃上，散戶接貨就馬上派貨，呢啲炒作時間亦比正常短癮好多，通常三幾日已炒完，散戶跟炒，從時間上講都好少位可以走，反應稍慢已被套牢。
炒作板塊 來去如風
如今愈來愈多內地股也在香港上市，所以內地股有異動時，香港相關股也會跟住炒，但從成交量上睇，我覺得香港不是主戰場，多數係人炒我炒而已。
例如上星期五炒作城鎮化工作時間表和RQFII試點辦法實施細則(RQFII即「人民幣合格境外機構投資者」，指合資格投資機構將在香港籌募的人民幣資金，匯入內地投入股市或債市)。城鎮化消息源自《上海證券報》，指全國推進城鎮化工作的時間表已定，由發改委牽頭，十年發展綱要將於6月底前完成，由國務院發佈實施。消息刺激一眾城鎮化概念股大升，如南車(3898)升3.5%。城鎮化古仔有排講，但一有消息出籠，就可以短炒一轉。
炒RQFII就話有關試點辦法實施細則已逐步落實，外地資金流入後最有利內地證券股，內地炒起香港跟風，國泰君安(1788)升7.2%，以及中信證券(6030)升3%。按道理如果RQFII引入資金真係咁有效，內地股市應該炒到慶烚烚至啱，但內地大市炒唔起，只係證券股炒起，唔係幾合邏輯。
散戶鍾意聽消息炒股，見股價上升，又鍾意搵一個理由解釋，其實股價上升最直接的理由是資金流動，多資金流入一隻股票，佢就會升，資金流出，佢就會跌。若然無局的情況，出現一啲消息，資金自然流動，相關股份都未必會郁，或者郁都唔大，這反而正常。一出消息股價就大升，升得誇張，成交又大，就未必咁正常，真正原因可能係大戶認為，唔升3、5個巴仙吸引唔到眼球，升得夠誇先至易引人落疊。
盲信概念 好易上身
由於股市好多人造局，我唔想變羊牯，所以逢見有股份大升，都會先睇睇佢近日成交，睇吓買賣的陣容，同時搵張股價圖來睇睇。隻股唔大，成交好大，買賣盤都排到密一密，金額相當大者，都有「搭棚」的嫌疑，隨時咁大陣容都係莊家大戶造出來，令你見到買賣活躍，以為流通性高，放心落疊。睇股價圖主要睇佢近日走勢，到底佢股價高定低先，若然由低位升少少仲易入信，若然已炒到飛起，連續幾日幾支大陽燭向上，我就好有戒心，成日問自己，「而家乜嘢環境先，升得咁勁？」
聽中環茶友講，在內地莊家好多同芬佬夾埋，想食大茶飯，但在香港股市細監管嚴更難玩，莊家都唔係諗住食大嘢，通常快手炒一浸就閃，所以跟炒概念股，若手腳唔快，好易扮蟹。我加一句，唔好成日用啲大紋大路的理由(例如城鎮化)，去解釋股票短期的升跌，盲信概念，入得太遲，入位太高，輸咗唔走，好易上身。
陸羽仁
上一頁 下一頁
金融High Tea 舊文
