中環在線：上市商會選主席辛定華WIN - 李華華
上市公司商會噚日召開週年大會選出新主席，晶門科技(2878)主席辛定華以黑馬姿態當選。前主席羅嘉瑞冇全退，同新地(016)財務總監陳國威(原屬委員)一齊轉任副主席。
商會越見人強馬壯
上市公司商會早於2002年因「仙股事件」而成立，起初牙力一般，及至2008年底發生「董事禁售期事件」，藍籌股陸續參與成為成員，人強馬壯起來，羅嘉瑞翌年開始成為主席，專門同監管機構溝通同講數。
聽聞噚日開會，早排傳出有意參選?和黃(013)副董事總經理周胡慕芳冇選，只有辛定華出選，並獲委員一致通過由佢接任。周太續任常務副主席，同另外四位副主席都係核心成員。
觀乎新地亦有代表做副主席，呢個商會似乎越來越有份量。事實上，商會舊年底慶祝十周年，超人李嘉誠亦有畀面到賀，可見非一般地位。
熟悉條例講數話咁易
辛定華投資銀行出身，包括晶門在內，佢係五間上市公司獨董，做過聯交所上市委員會、證監會收購及合併委員會委員，熟悉條例同市場運作，日後同監管機構講數，冇難度。
李華華
mailto:LiWaWa@AppleDaily.com
上一則: 樂香園：樓市欠最後一條稻草 - 密西比
下一則: 中環在線：維他奶主席72歲未言退 - 李華華
中環在線 - 李華華 舊文
