金融High Tea——無買唔使㷫
2013年6月28日
■滙豐環球的孫瑜預期中資股將會繼續波動。資料圖片
港股一度反彈三百點，連同前日勁升四百幾點，累積回升近八百點，有錢多股少的朋友問，有乜股好買？正如早前所講，大市周初狂插，事後部份股民大歎無喺低位入市，我的反應是有早知、無乞兒，分析股市切忌用倒後鏡去睇嘢。
有好多長年買股但無錢贏的股民，口頭禪係呢隻股我一早睇好佢，跟住你問佢點解無買，佢會有一百個理由解釋。舉凡呢類股民，十有九個投資成績唔會標青，皆因股場如球場，都係英雄地，話之你有一百次埋門，最重要係有無入波先，你貼一百隻股票全升無用，最緊要係你買果隻有無升，所以如果想投資有成績，第一步就係要逼自己面對現實，只係睇住個倉賺蝕去分析，唔好成日講早知。
好似今個市反彈，陸羽仁唔會講早知，只會同朋友講，你今日見佢反彈，咁你知唔知佢明日彈完未？朋友唔明，陸羽仁畫公仔畫出腸，話咁即係唔知個市係真見底，抑或係炒反彈、彈完再跌囉。
港股續做「有性格的狗」
呢兩日港股表現，有不少特殊因素，除咗話大市跌咗幾千點，內地定點放水穩定銀行同業拆息，仲有係6月會理半年結，基金經理好好醜醜，都要做吓盤點，若然之前沽貨沽得咁上下，都會停停手唞唞先。由於周初大市急插，好多熊證同衍生工具都已經殺咗倉，大戶無動機大力插低。
昨日期指結算日，一如之前所料，港股繼續做「有性格的狗」，唔跟內地市玩，內地市無乜升跌，大戶在香港玩開夾上，即月期指平開，最高夾到高位20688點，最後回吐番少少，恒指升102點，收報20440點；國企指數倒跌6點至9159點。大市成交縮減至699億元。昨日期指結算價同周二低位比較，在當日近低位開咗好倉，真係食足1000點至走。
雖然大家都會覺得大市好似好勁，但唔好忘記佢係從一個月前高位直插4000點到低位，反彈1000零點濕濕碎，唔好因為見到反彈，就完全失去風險意識，大市走勢暫時仍和預期一樣，目前只是一個反彈市形態，怕佢再彈多少少就要回頭，在7月仲要再考驗一下低位。
經紀張又犯上市場情緒病，大市抑鬱佢更抑鬱，大市亢奮佢更亢奮，昨日見到個市升完又升，好揼心咁話早知星期二大手掃入。我贈佢兩句，唔好市好睇好，市淡睇淡，星期二無買，肯定錯過咗「今個星期」最佳入貨時機(斷估今日唔會跌番到周二低位啩)，但係唔係錯過咗「今年」最佳買貨時機，起碼要睇埋7月至知。
今年仲有入貨時機
港股近期反彈，主要是受內銀平空倉帶動，上日就達120億元資金入場掃貨，建行(939)及工行(1398)齊齊彈超過6%。內地銀根緊絀，加上市場憂慮內地拆息(SHIBOR)及美國加息問題，一眾內銀股跌到阿媽都唔認得，市場出現嚴重超賣。人民銀行、中證監、中銀監呢兩日一齊釋放維穩訊號，平抑了市場一定疑慮。
恒指1個月跌近4000點，匯豐環球的孫瑜就話，人行擠壓銀行間資金流，低估對股市影響，因此近日語調有些軟化。預期中資股會繼續波動，股市風險仍高，建議投資者買偏好防守性板塊，例如高鑫零售(6808)、聯想(992)、騰訊(700)、利豐(494)、中移動(941)等。
陸羽仁
上一頁 下一頁
金融High Tea 舊文
