金融High Tea——贏輸有條路
2013年7月2日
港股上周五半年結，雖然當日再升363點至20,803點，叫做半年結收番在高少少的位置，但總結上半年仍要跌1,853點，跌幅達8.2%，跌幅在全球主要股市中僅次於內地股市，為全球第二衰。
全球最差的主要股市上證綜指跌12.7%，內地黑氣盡現，拖住香港股市。反觀全球主要股市中表現最好的是加入大放水行列的日本，日股雖然已從高位回吐，仍升31.6%；第二大升幅的主要股市同樣是大印銀紙的美國，美股杜指上周五雖然回吐114點，但上半年升幅仍近14%，創自1999年14年以來表現最佳的首半年。
有水無水，始終是股市短期升跌的關鍵，所以老師父教我睇股，主要睇利息，利息升，資金成本升，利息上升之初多數係經濟剛向好之時，股市尚可保持繁榮，到利息加完又加，股市老牛喘氣，隨時轟然回落。相反利息跌之時，通常係經濟轉差之時，初時減息刺激作用不大，但減到比較狠時，股市就有反應，開始扭轉敗局。老師父睇的是利息左右資金供應的正常時期，如今美國利息減到零，再加狂印錢，老師父的時代未曾見過央行放水放到咁離譜，但道理相通，水多股市就升。
中國調整 無咁快完
美國印錢，中國內傷，美國是阿伯食偉哥，食完啱啱好，中國是後生仔食偉哥，食到鼻血長流，唯有跳入冰水降溫，自然會患上大感冒。
人比較喜歡隨舊模式思考，而家都會停留在中國「馬上好」的思維，覺得有問題中央一搞就得，困難半天過去，過了半年結放番水就無事。雖然我對中國仍算係樂觀派，覺得中國的問題可以解決，但就無咁樂觀一過完半年結就無事，中國要調整經濟喎，短短哋都要一兩季先至完啦。
反彈未完 反覆尋頂
中國經濟將會從高位回落，超高增長不再，已是不爭的事實，習主席都再打開口牌提醒大家，佢出席在北京召開的全國組織工作會議時就話，「再也不能簡單以國內生產總值增長率來論英雄了」。佢強調，要改進對地方政績的考核方法手段，把民生改善、社會進步、生態效益等指標和實績作為重要考核內容，而非單以國內生產總值增長率來論英雄。
習主席係針對緊問題的根源，中國是政府主導的體制，經濟虛長，產能過剩，好大程度係政府、特別係地方政府造成，過去經濟增長就是地方政府成功的指標，所以地方就大力借錢搞「鐵公基」建設(鐵路公路基建)。如今老闆話明不簡單地以GDP論英雄，即係叫地方政府唔好亂咁投資。如此下來，中國經濟增長難免放慢。
外資暫時對中國股票熱情冷卻，有其他選擇時不買中國股，買中國股只是在佢跌好多時追吓落後，買咗炒幾成反彈又會走人，似乎仍然是可見將來的基本局面。延伸到股市分析，第三季都唔使太快睇好，一則美股仍在觀望聯儲局9月會否減低放水量，預料短期仍是上落市居多。二則內地股市還是在調整中，既然不會馬上大放水，自然也不會「馬上好」，市場要觀望9月底10月初中共三中全會推的經濟改革方案，所以預計第三季內地股市還是觀望兼向下試底居多。港股在上月底超跌，現正反彈中，短線月初還可能有一段反覆的反彈，尋到反彈頂位後再回落。
睇番上半年50隻藍籌股表現，可見贏輸有條路。上半年表現最差的藍籌股則為內地煤炭股，受煤價下跌打擊，昔日散戶至愛中煤(1898)和神華(1088)名列跌幅頭兩位，半年跌幅分別達51.8%和41.7%，而國企股榜中兗州煤業(1171)更以56.6%的跌幅居首。佢哋都係今年1月升上高位，造成追貨陷阱，你追入唔止蝕真係命都無。新興市場經濟唔好，煤價低處未算低，煤礦股真係好難搞。
中國動向 股好價貴
另外有一種升得多一轉勢慘跌的類別，值得留意，藍籌股跌幅榜的第三位係百麗國際(1880)，佢係內需概念股，過去係股王，如今強勢不再，上半年跌幅達36.6%。教訓係唔係唔掂資源股就得，唔係買消費概念就有保障，升得多業績一追唔上就會散，你話散戶買自己唔識睇，盲買一個熱門行業，佢轉咗勢都唔識走，一樣會死，盲買煤股係咁，盲買百麗都係咁。
講起熱門行業爆煲，令我想起中國體育用品股，早幾年炒內需股時，內地體育用品股曾炒到熱火朝天，那時我一句都唔敢提呢啲股，因為見炒到咁熱，新公司又一間一間咁上市，佢哋在股市圈了錢一定會掟錢割喉競爭，真係一個爆煲格局，結果不出所料，真係爆咗。但爆完之後，我反而會注意。
非凡中國 醞釀翻身
早前和業內人士飯聚，問起佢地點睇，講起兩隻股份，一隻係中國動向(3818)， 一隻係李寧(2331)的控股公司非凡中國(8032)。中國動向老闆陳義紅，他過去係李寧的行政總裁，有「李寧背後的男人」之稱，造就李寧品牌的成功。呢隻股的缺點是價錢貴，回吐咗都有31.6倍市盈率，更唔好處係大股東陳義紅在高位減持，佢於6月13日減持2.5億股中國動向股份，每股平均價1.4元(上周五收1.25元)，套現約3.5億元，我擔心大股東都覺得股價貴，即使間公司經營唔錯，但暫時唔好掂住，最好等到有大跌市急插時才低撈。
李寧(2331)早兩年經歷重挫，經營不善，主要是管理問題，後來引入美國巨型基金TPG入股，其實最大好處不止是引入資金和名牌股東，最好的是TPG監控了李寧經營管理，逼佢要用現代化方法經營體育用品企業，估計到明年李寧有機會重上盈利之路。
非凡中國是李寧的控股公司，除了控制李寧股權外，還經營體育相關地產，李寧似乎有心搞好呢間控股公司，不斷引入資金壯大股權，今年2月先引入劉央主理的西京投資認購4.8億股新股，集資2.4億元，當時入股價按每股0.5元，較當時收市價0.4元有高達25%溢價。
非凡中國上周五晚又公佈新消息，又係高溢價批股，今次係大股東李寧出讓了5億股(相等於8.2%股份)給一位獨立第三方，公佈無寫接貨者名字，收購價比上周五收市價4.25元，有17.6%溢價，大有唔到0.5元唔賣股的態度。
據聞接貨者是已故全國政協副主席馬萬祺的孫兒、已故國家副主席榮毅仁的外孫馬志成，他今年才35歲，李寧讓出股份邀請他成為戰略夥伴。另外李寧也不斷壯大非凡中國的管理團隊，邀請了昔日是南豐陳廷驊的得力助手、現在是盈科地產的執行董事陳進思先生加入非凡中國的董事會，看來陸續有搞作。
公司轉型並非易事，但李寧似乎深明自己弱項，不斷搵強手加盟或成為夥伴，可以「投機性留意」，但呢啲股最好在回落時低吸，例如今日升就唔好高追。
陸羽仁
上一頁 下一頁
金融High Tea 舊文
