金融High Tea——有胡唔食罪大惡極
2013年7月8日
上周五美股杜指回升147點，升幅1%，港股在美國的預託證券卻唔跟美股升，反而跌198點，跌1%，今天開市唔好以為港股一定會跟美股大升。
周末中環茶友聚會，熱門話題竟然不是美國市，而是人稱「哨牙通」的陳振聰，大家唔係用一個嫉惡如仇的角度去討論呢件事情，而係佢最終瑯璫入獄，究竟作了甚麼錯誤「投資」決定，搞到今天這種田地？到底我們從削牙通這個負面教材，可以學到甚麼？
哨牙通由一個餐廳侍應，變身一個風水大師，然後埋到前立法局議員梁錦濠身，再通過他介紹認識小甜甜，自此交上好運，曾經拿過龔如心20億元現金，錢多到陳振聰要出動兩名胞弟帶備網球袋去攞錢，豪到想花15億去買架空中巴士的豪華版A350小型客機去做私人飛機，做埋上市公司宏霸(802)的主要股東，高峰時身家閒閒地有20、30億。
這還不止，陳振聰手持小甜甜遺囑要去接收小甜甜資產，搞到和華懋慈善基金打官司，基金一度提出要以20億和哨牙通和解，後來一再加碼到60億，哨牙通都唔制，誓要攞晒華懋800幾億資產，就是由這單爭產的民事官司，觸發到後來告削牙通行使假遺囑的刑事案件。
諗贏唔諗輸
若削牙通收60億和解走人，加埋原有資產，身家隨時過100億。但他硬要死砌，還被政府追稅，左扣右扣，加上連場官司花費甚巨，身家所餘無幾，食夠走人和如今一舖清袋，由100億變到接近0，差別巨大。難道佢無諗過自己會輸？
有個中環茶友跳出來解釋，削牙通係賭仔心態，諗贏唔諗輸，不斷去賭始終都會輸死收場。佢講一個真實故事，有個由內地派到澳門國企做事的幹部，挪用公款100萬去賭場搏殺，點知佢真係鴻運當頭，賭到半夜12點竟然俾佢贏了500萬，佢開開心心返到宿舍，瞓上牀心諗，估唔到自己咁叻，咁就贏500萬，明天把本金100萬還回去神不知鬼不覺。但佢開心到瞓唔着，諗諗吓又覺得，再贏落去500萬可以變1000萬，甚至2000萬，點解唔賭多幾舖？
愈諗愈唔忿氣，佢覺得自己咁好運點會贏得咁少，1點唔夠就起身返去賭場再賭過，結果唔使兩個鐘，佢不止輸光先前贏的500萬及100萬本金，仲唔服輸借錢再賭，最後倒輸500萬，被疊碼仔押回宿舍，驚動了所有人，結局係第二朝就俾人押返內地。
茶友話哨牙通一路賭一路贏，由侍應賭到變上市公司大股東，當然覺得自己聰明絕頂，條命極硬，總之賭親都贏，既然見到小甜甜800億身家在望，梗係要賭埋呢一舖啦！
我話哨牙通慘劇的第一個教訓，係買股票唔好「諗贏唔諗輸」，唔好成日諗住買中就一朝發達，完全無諗買錯會點。買股票首先要衡量風險，要諗吓萬一賭輸會點？若然輸咗結果係輸晒成副身家，兼揹上成身債話，就要真切考慮係唔係賭落去啦。
無預黑天鵝
哨牙通在操控小甜甜時如魚得水，予取予攜，但到出來打官司時，先敗爭產民事官司；再敗偽造文件刑事官司，連連踫壁，其實係遇上政府呢隻黑天鵝。在打爭產官司時，律政司加入作為參與方，理由是小甜甜在「舊」遺囑中寫明財產捐作慈善，律政司就以保護慈善資產的理由，加入成為官司參與方。
律政司的態度好明顯，擺明要插手，唔俾削牙通亂來，政府的介入亦反映社會大多數的訴求，哨牙通的強勁對手突然出現，一步步將他拉入無底的深淵。民事官司剛開局，刑事調查已在等候，警方派人全程聽審，搜集證據，陳振聰的惡運就接踵而來。
哨牙通失敗的第二個教訓，係買股票要預備有黑天鵝出現，要計好萬一有黑天鵝時自己都有險可守，唔會輸清光，先至好跟，否則就唔好賭咁大啦。
哨牙通最難的抉擇，是何時離場，事後孔明，佢同華懋基金會打官司之初，基金會被凍結資產無錢打，要提出與哨牙通和解，將和解金額由20億一路加到60億時，事後看這是哨牙通撤退的最佳時機。佢要出來打官司，要面對公眾，去到自己能力不能控制的範圍，無見好即收，係一個致命的決策錯誤。
我同一個大孖沙食飯，佢係白手興家的人物，佢話佢每次做大交易時，都諗諗度門有幾大幾高，諗吓自己過唔過得到，如果可能過唔到時，就唔去博啦。陳振聰一個風水佬，以為搞掂小甜甜就可以食晒800億資產，要過政府和公眾呢關，佢真係無諗過可唔可以過到呢度門喎。
可分段食胡
哨牙通事件第三個教訓，係做人做事要照鏡，若買股超出自己範圍，例如借到好大去賭時，就唔好咁博，不如見好即收，有胡唔食，罪大惡極。
止蝕是保命技巧，食胡也是一門藝術，投資順風順水時，要決定在哪個時候哪個位置離場，殊不輕易。但買股有一個最好的地方，是可以選擇部份離場，先沽一部份走人，唔駛沽晒。
哨牙通只有一個決定，繼續博大或攞錢走人，佢唔可以決定部份離場，部份再博，但買股票就有此優勢，升得多時可以食一部份胡先，若部份沽股賺價已能取回本金，餘數就是用街外錢去博了。騰訊(700)最近升上300元樓上，首席技術官張志東又減持，翻查紀錄，佢過去曾在騰訊60多元和120多元時售股，所以又唔以話佢減持代表騰訊好唔掂，但佢手上咁多騰訊，減咗咁多次還有3.5%，怕乜在抽高時沽啲貨，搵啲錢使吓？哪個是最高位，真係內幕人士都唔知啦。
由此諗到哨牙通事件的最後一個教訓，就係唔好做壞人，要過正直、幸福、善良的生活，錢少一點，但生活過得愉快，已經好足夠。我見慣富豪的生活，華衣、美食、靚女、名車、豪宅、遊艇或私人飛機，其實也不外如是，物質係多，但也不一定等如快樂。普通人一家和和氣氣，肯定比有錢人家庭勾心鬥角爭產愉快得多。
引申到炒股，不要期望一朝發達，只要穩紮穩打，年年唔輸，兼有進帳，複利增長，就可以達到財務自由。要領會哨牙通的例子內藏的道理，以為可以10步登天，但行到第9步就墮崖，但呢種人墮崖是否早由他們邪裏邪氣的性格決定了？陳振聰如是、羅兆輝也如此，性格決定了命運。
最後想講兩句，點解美股升，但在美國上市的香港預託證券唔係幾得，上周五美國公佈6月新增非農業職位為19.5萬個，好過市場預期；同時將5月新增非農業職位向上修訂為19.5萬個，市場一向認定如果每月有大約20萬個新增非農業職位，就代表經濟持續復甦，聯儲局就有可能在9月的會議，決定減少每月850億美元的放水量，所以呢個非農數據係收水訊號。
聯儲局可能收水，但美股不跌反升，皆因就業增加其實是利好企業基本因素的訊息，顯示在經濟好轉的收水初期，投資者不是一面倒沽貨，沽得多又會買番。不過，對香港而言，經濟麻麻，收水在望，就唔係咁好消息啦。
陸羽仁
上一頁 下一頁
金融High Tea 舊文
