金融High Tea——生意唔好硬要炒
2013年8月15日
昨日打風無市，但有唔少公司公佈中期業績，特別係國泰航空(293)和騰訊(700)最刺激眼球，國泰業績道盡傳統周期性股份在低潮時遇上的問題，成本高，生意縮，真係唔蝕都偷笑。高增長的騰訊亦因推廣開支上升，盈利未及預期。
國泰航空周三發佈的上半年純利差過預期，只有2400萬元，雖然好過上年同期淨虧損9.3億元，但遠不及彭博通訊綜合分析員估計純利中位數5.9億元。要注意的是，國泰去年上半年雖然蝕9.3億，但全年賺9.2億，即係話去年下半年業務好轉，一來一回賺18億以上，但到今年上半年又變番只賺2400萬，顯示業績再下滑。
業績唔好都係因為生意唔好，或者成本上升，國泰就兩樣都齊，上半年營業額486億，跌0.6%，當中貨運跌5.2%，送少啲貨，運費又低啲，因為亞洲貨運業務受禽流感及中日政治爭拗影響。客運亦唔見得好，隨着金融機構裁員以及公司壓縮飛行預算，頭等及商務艙的需求萎縮。頭等和商務客位收入係經濟位幾倍，所以航空公司客運賺唔賺錢，主要睇頭等和商務客多唔多，而家呢啲客唔見咗咁多，航空公司生意都好難做。
國泰少咗貴客
國泰生意唔夠好，成本一啲都唔輕，雖然國泰話已利用5月油價較低時大手入貨，但睇住90幾美元、100美元的油價，都知道航空公司無運行。有航空業人士話畀我聽，油價在75美元以上時，國泰都好難賺錢。
國泰股票現價14.26元，去年公佈中期蝕9.3億時，佢去番低位12元左右，現價仲有下行壓力。另外仲要明白，國泰嘅生意，無咁快見曙光。中環茶友話，佢坐國泰機發覺飛機餐愈來愈少嘢食，已經覺得國泰節流節得好厲害。航空公司這種周期股，是經濟好壞的晴雨表，見到佢生意咁，亦都意味一大片做出口的公司唔係好掂。而且人工、運輸、租金成本咁重，做生意真係愈來愈難。妙就妙在經濟環境唔係咁好，但股市照樣硬炒。
騰訊差過預期
另外，騰訊(700)公佈中期盈利雖然增長唔錯，但就差過預期。騰訊截至今年6月底中期純利77.2億元人民幣，按年上升27.7%；每股盈利4.213元人民幣，不派中期息。上半年營業收入279.3億元人民幣，按年升38.4%。
拆開睇，騰訊第二季純利36.8億元人民幣，比市場預期平均數39億低，屬市場預期下限，按年上升18.7%，按季則倒退9%，差過市場預期，主要因為欠缺上季度來自投資公司的特別股息收入，以及加強微信(WeChat)在國際市場的推廣活動支出所致，第二季推廣開支按季增加28%，至12億元人民幣。微信活躍用戶在第二季升至2.4億，是一年前8520萬的兩倍，估計年底會增至4億。
騰訊或會因為業績不如預期而捱沽，但其實佢已經係內地網絡市場的殺手，打低大量對手。
第一代互聯網生意以入門網站主導，騰訊唔係一哥。第二代生意轉去微博，騰訊已成一哥，開始拋離第二位的新浪。第三代玩手機，騰訊微博在內地稱王，新浪叫苦連天，最近新浪門戶網員工大幅減人工，變相裁員，可見生意有多難做。
仲未講手機媒體興起，搶走內地傳統媒體生意，例如在港上市的北青傳媒(1000)，旗下的《北京青年報》曾紅極一時，最近生意都下滑，北青傳媒股價亦乏善足陳。依家整體生意都唔係咁好做，內地係咁，香港亦係咁，若有一些公司生意好，其實係食咗好多其他公司的市場。不過股市上落，短期就未必跟公司生意走啦。
陸羽仁
上一頁 下一頁
金融High Tea 舊文
