似1967?
2013/10/3 上午 09:46:49
網誌分類: 經濟
美國的預算爭拗又被人扭曲成為「好消息」，因為拗得勁會令聯儲局無可能咁快收水喎，真係任講都得，不過美股跌幅真係先擴大後收窄。
美國ADP發布的9月私營領域就業增加人數16.6萬人，增長人數比上月略高，但低過市場預期的18萬人。不過，9月增長之所以較8月高，原因係8月增長人數由17.6萬下調至15.6萬人，反映美國就業情況唔係咁靚仔，相信係受到美國政府年初開始縮減開支以及富人加稅影響之餘，市場亦預期了共和黨人會借預算案及債務上限這個題目，推延甚至阻止「奧巴馬醫改」的推行。美國政治及經濟前途未明，挑通眼眉的商人，自然唔會加大投資，擴充業務啦。
波士頓聯儲銀行行長羅森格倫(Eric Rosengren) 昨日表示，近期公佈的經濟數據表明，美國經濟正在「涉水」前進，而不是變得更加強大。所以，聯儲局應該只會在未來幾年時間裏慢慢縮減量化寬鬆(QE)規模，以確保美國經濟走向充分就業之路和實現2%通脹目標。最終停止QE的時間會較主席伯南克提出的2014年中晚好多。不過羅森格倫係鴿派，本來都唔贊成太快收水，所以佢咁講似乎在意料之中。
就業市場無改善，聯儲局官員放風當局唔會咁快收水，外圍方面，歐洲宣布維持0.5厘基準利率不變，歐央行行長德拉吉話，歐央行將「尤為關注任何可能威脅到經濟復甦或導致通脹過低的市場利率變化」，意味著歐洲仍會繼續其寬鬆貨幣政策。再加上意大利前總理貝盧斯科尼忽然唔玩，指目前會支持執政的萊塔政府，意味著意大利免去了政府崩潰的局面。歐洲局勢轉趨穩定，歐洲股市第二日向好。
美股表現反覆，政府因預算案過唔到，上日開始關門大吉，投資者當無事發生，美股照升。昨日早段遇上ADP私人就業數據唔理想，一度大跌147點，但之後慢慢收復失地，杜指收市回吐59點至15133點。但金市顯示人心未穩，紐約黃金期貨價格亦抽升2.7%至每安士1320美元，扭轉周二大幅下跌的走勢，市場避險情緒高漲。股市恐懼指標VIX指數也升上16點上方，反映投資者開始憂慮後市表現。
LPL Financial的Jeff Kleintop發現今年美股和1967年的走勢出奇地接近。美股面對的形勢是一種「踢汽水罐模式」("kick-the-can" pattern)，出現好多間題，但係好似踢汽水罐咁，漫無目的，但碌碌吓又過關，這些問題包括GDP唔鹹唔淡升2%，標普500成份股來季盈利和去年持平，債息上升等等，期望政府關門和債務上限問題又係咁碌碌吓走過場。
佢話今年股市頭三季走勢和67年走勢極似，若往後都如此，股市在頭三季一級級上，在9月底10月頭見咗高位，然後跌一個月，比高位跌7、8%(即係仲有4、5%跌)，到10月尾11月初見一個小底，然後12月再升上近全年高位收局。若要配合這個先跌後升之勢，就係政客先搞局，然後又用「踢汽水罐模式」慢慢在10月底、11月初解決，迎來12月反彈。
呢啲睇法近乎迷信，因為2013年和1967年點解相似，無乜科學理由去解釋，不過既然出現頭三季似得咁緊要的異象，令人懷疑第4季係唔係真係都會照樣行呢?
LPL Financial
Source: Bloomberg, LPL Financial Research
陸羽仁
回應(4) 我想回應
陸羽仁 BLOG 舊文
