金融High Tea——雲遊可等「過版」
2013年10月3日
美國預算案過唔到，搞到部份政府部門要關門大吉，不過美股投資者預計事件只係暫時性，美股反彈，香港投資者一於照炒可也，乘住內地國慶假休市港股自由行，港股玩炒上。
恒指昨日高開142點後突破23000點，中午一度升279點至23139點，但在10天線關前無功而回。午後升幅逐步收窄，收市連23000點都保唔住，恒指收報22984點，升124點，國企指數靠穩，微升17點至10333點。大市成交551億元。
長和系昨日獨領風騷，長實(001)升3.8%至122.6元；和黃(013)漲3.3%至95.95元，拋離大市。初睇長實大升以為係地產股升，但睇番隻新地(016)只升0.3%，老實講近排地產商賣樓真係麻麻，不利地產股，去年國慶假期單日新盤成交近百單位，今個「十．一」，成交只有44伙，連一半都唔到。賣得好少少只係新世界(017)的元朗「溱柏」，新推42伙，賣出26伙；新世界股價升1.4%，雖然升得唔少，但遠未及長實的3.8%升幅，可見長和系有獨特利好因素。
傳拆屈臣氏長和炒上
市傳李超人除了拆售百佳和分拆港燈上市之外，還計劃分拆零售旗艦屈臣氏集團上市，估值高達3,000億元，只係出售27%股份都可以集資超過800億。傳聞急於出售百佳和想分拆屈臣氏有關，因為百佳是屈臣氏的子公司，百佳盈利率只有5.8%，若百佳留在屈臣氏旗下，會拉低屈臣氏上市的估值，拆售百佳後，屈臣氏就可以作個好價。
傳聞似層層，大行瑞信給和黃「買入」評級，目標價105元。和黃就大升3.2%，收報95.95元，創52周新高，令長實都急升3.8%。市場上有部份人成日彈和黃債高，今次李超人沽完百佳、拆埋屈臣氏，揸番過1000億現金在手，佢真係懶理你哋講乜啦。
昨日升得多的有國慶黃金周相關股、太陽能股和科網股，網股之升，和網上遊戲新股雲遊(484)暗盤旺場有關，雲遊公開發售部份獲超額認購312倍，今天掛牌，預計都會高升，帶起科網股搶先炒一炒，如騰訊(700)升2%、金山軟件(3888)升5.1%、擎天軟件(1297)升4%、中國軟件(354)升5.2%。值得留意騰訊和金山軟件雖然升得多，都在歷史高位附近橫行了一段日子，走勢有啲呆滯，若不能快速破位向上，小心好快有較大回吐。
基金買唔夠貨
講番雲遊，佢係內地網絡遊戲公司，總部位於廣州，今次上市發售3,137萬股，雖然公開發售部份獲超購逾312倍咁多，但仍照顧小散戶，人人有份，認購一手中籤率百分百。雲遊招股時發售價上下限為43.5至55元，雖然咁受歡迎，但沒有在上限訂價，只訂在51元發售，好似想保留啲水位畀大家炒吓。
根據輝立證券昨日就雲遊的市前交易顯示，雲遊暗盤價收報60.1元，較上市價51元高出9.1元，或升17.8%，輝立成交咗106萬股，涉資6,230萬元。
我聽芬佬講，雲遊超額倍數太大，基金大多買唔夠貨，但由於散戶一人一手，有不少貨在老散手上，估計佢哋好多見升10%、20%會沽，所以明早將會是一個散戶沽貨、基金接貨的格局。聽佢咁講，我又覺得散戶唔使太急沽，若開市初段有機會回低啲，還可以吸吓貨，等散戶沽到七七八八之後，貨入強手之中時，雲遊仲可以過版升呢喎。
陸羽仁
上一頁 下一頁
金融High Tea 舊文
