金融High Tea——有線乾炒 小心批股
2013年10月17日
政府批出兩個電視牌照，無魔童王維基份，搞到一地眼鏡，魔童王好火滾，要大裁員320人，佢隻香港電視(1137)大跌34%唔奇，但攞到牌的有線寬頻(1097)升155%升到癲，就真係夾到令人跌眼鏡。
美國債務上限死線臨近，評級機構惠譽踩多腳，將美國信貸評級納入負面名單，令美股挫逾百點，加上內地滬深兩市雙雙重創1.8%，港股一度跌逾兩百點，恒生指數全日跌108點，險守十天(23126)及二十天線(23163)收市。不過，市場最吸引眼球的，仍是幾隻電視股。
盤點幾隻股升跌，前日升錯咗的香港電視自然要插，守唔住上升之前的周一收市價2.39元，昨早低見1.88元，後來彈番少少收2.03元，跌33%，成交金額3.3億。而電盈(008)升4.8%收3.64元；有線寬頻(1137)中大獎，昨日一開市見0.6元升28%已經是最低位，之後一直急升，升到11點左右上到1.47元高位，狂升213%，之後反覆回吐番啲，收1.2元，仍升155.3%，若果咁黑仔在高位1.47元摸入去，到收市已跌咗18%，應該打咗靶。有線寬頻升得咁勁，佢個阿媽九倉(004)就完全無反應，仲跌0.3%。將面對電視業開放的電視廣播(511)好似完全唔擔心競爭，仲要逆市升0.3%，好似慶賀無咗魔童呢個強勁對手咁款。
街貨轉咗兩手？
有線寬頻升得咁癲，令人跌眼鏡，值得深究。有線升155%，升到市值24.4億，你要講可以講電視廣播有214億市值喎，有線攞到個牌升到24億市值未為多，升到48億市值都得呀。真正問題係有線去年蝕緊2.8億，做埋免費電視，幾時可以打平賺錢呢？若然三幾年內都唔係咁易賺錢的話，值唔值24億市值？
我認為講基本因素解釋唔到有線點解升咁多，真正升因係貨源歸邊，佢有20.1億股，大股東九倉佔73.6%，街股得5.3億股，昨日竟然成交咗11.5億股！假設大股東九倉無減持，即係理論上街貨轉咗兩次有多，實際上可能有大戶一掃上0.8元、0.9元，已把街貨收乾，之後任佢舞，如入無人之境，要幾高有幾高，升1.5倍都係閒事。
我請教過退休股壇大佬，佢話成交係街貨總量兩倍有多，唔係幾可能係街貨轉兩轉，因為咁多貨散晒咁轉手，無可能抽到咁高，似係大部份貨源歸邊，用幾億收乾貨隊上去唔難，問題係佢動機係乜？就咁上炒高散貨唔易。佢話做莊最忌炒高咗，大股東賣舊股或發新股，因為大股東一沽就散，除非炒家同股東有默契則另作別論。無論如何，炒到咁高，有線應唔應該趁高批股集資呢？
有線未必夠現金投資
睇有線盤數又發覺佢幾缺水，佢到今年6月底只得現金1.6億，蝕多7、8、9月可能得番1億多少少，未來6年何處搵10億去按承諾投資免費電視？最好就有人炒高少少，炒到30億市值就出來批股，集資番10億、8億，用OPM(其他人的錢)去投資。股民好多時係咁，唔升唔覺得好，愈升愈覺得佢得，盲舂舂去跟。呢啲股有可能一集完資就散，跟炒要睇路呀。
陸羽仁
上一頁 下一頁
金融High Tea 舊文
