內房死唔去
2013年11月11日
上周末美國和中國都有重要數據公佈，觸動市場。最激的要數美國就業數據，美國勞工部上周五公佈10月份非農業就業數據，市場原本認為10月有一段時間美國政府關門，非農數據好極有限，經濟學家共識係增加12萬個職位左右，點知最後公佈，10月非農職位增加20.4萬個，遠比經濟學家預期為高，政府關門好像對就業職位毫無影響。
另外報告亦向上修正8、9兩個月非農就業人數，意味美國經濟狀況的實際表現，可能比表面上更強勁。其中9月份的新增非農就業職位向上修正至16.3萬個，本來早前公市的初值為14.8萬個；8月份的非農就業職位亦向上修正至23.8萬個，初值為19.3萬個。
市場一直認為，非農就業職位增加20萬個以上時，聯儲局就會收水，依家8月增加23.8萬個，9月增加16.3萬個，10月增加20.4萬個，咁睇美國就就業數據都好接近收水的水平喎。
就業好 杜指升167點
當日美債利息在消息公佈後急升，市場原預計美國聯儲局在明年3至6月才開始收水，但一見這麼靚的就業數據，就怕聯儲局提早收水，美股早段有少少被嚇親，升勢受阻，但後段市場情緒穩定下來，反而覺得就業好代表經濟比預期好，其實係好消息，尾段愈升愈有，最後杜指升咗167點。美國聯儲局收唔收水的消息，有時搞到人頭都暈。
中國數據無咁精采，中國海關總署上周五公佈，10月出口按年反彈5.6%至1,854億美元，遠高於市場預測的增長3.2%，進口則按年升7.6%至1,543億美元，略高於9月的增長7.4%，但低過預期的8.5%。雖然出口按年升5.6%唔係咁勁，但總算好過預期。出口敏感股利豐(494) 上周五收市報10.64元，微跌0.4%，略少於大市當日0.6%跌幅，美國其後公佈超強的非農業就業數字，估計對利豐今天股價有所刺激。
另外中國國家統計局發佈數據，內地10月全國居民消費價格總水平(CPI)按年上漲3.2%，創下8月新高，但比預期低少少。通脹上升主要受食品價格上漲6.5%帶動，非食品價格只是上漲1.6%。
另外中國10月生產物價指數(PPI)同去年同期相比下降1.5%，預期為降1.4%，跌幅比預期略多，但10月PPI和9月比較則持平。數據顯示PPI依然較疲軟，顯示實體經濟復甦不如預期，儘管CPI增幅略較預期弱，但數字仍高。加上時近年尾銀根偏緊，每個月月底拆息都升，通脹向上令阿爺更唔敢放水。
通脹升 阿爺水難鬆
但內地樓市數字強勁，中國國家統計局公佈，今年1月至10月商品房銷售面積9.59億平方米，按年增長21.8%，但增長較1月至9月回落1.5個百分點；其中，住宅銷售面積增長22.3%，辦公樓銷售面積增長30.6%。
若以價錢計，商品房銷售額6.12萬億元人民幣，按年增長32.3%，增長較1月至9月回落1.6個百分點；其中，住宅銷售額增長32.6%；辦公樓銷售額增長42.5%。總的來說，今年內地樓市都好好，量價齊升，特別係下半年升勢加快，不過10月開始慢番少少。
上海加首期壓樓價
樓市好，發展商亦加快投資起樓。國家統計局公佈，今年1月至10月全國房地產開發投資6.87萬億元(人民幣，下同)，按年增長19.2%，增長較1月至9月回落0.5個百分點。其中，住宅投資4.72萬億元，增長18.9%，增速回落0.6個百分點，佔房地產開發投資的比重為68.7%。
樓價升，自然又惹起阿爺注意，要出招降溫。繼深圳後，上海宣佈買第二套房首期由60%增至70%等調控措施(即係銀行只借30%)，試圖壓抑當地樓市的升勢。
上海控樓價唔止出一招，出咗幾招，除了買第二套房要畀70%首期外，又加強限購令，由過去外地人若想在上海買樓要在當地交社保或交稅一年以上，改為兩年以上，令更少外地人符合買樓資格。
此外又更明確地方政府有責任管制樓價，要求落實各區縣房價調控目標責任制，各區縣、有關部門要按照今年初明確的房價調控目標積極採取措施，嚴格推行商品住房預銷售管理。
呢啲都係實質措施，但發展商都有好多方法繞過佢。例如政府控制價格，即係話樓價超外某一水平，就唔批准發展商賣樓，但發展商最通常的做法係將樓價降低，然後加一筆精裝修費用，瞞天過海。所以國家統計局有關樓價上升的數字，都好可能被低估。
上海出招的消息，令內房股在上周五下跌，如華潤置地(1109) 、中國海外(688) 、碧桂園(2007) 等都下跌，但問題係阿爺會唔會打死樓市呢？
依家開緊三中全會，重點係下放政府權力，加大市場的份額。對於樓市，政府唔能夠唔干預，聞說習主席的態度是商品房價錢由市場管，但政府要大力發展保障房，特別是廉租房，以保障低收入人民的住屋，無明令話要大力插低商品房的價錢。
碧桂園賣樓勁可低吸
內地經濟增長放慢，依家要大力改革推動經濟，但改革是長遠措施，短期都唔可以令經濟跌得太快。樓市和汽車是內需經濟兩大支柱，樓市死咗經濟亦無運行，所以阿爺雖然好唔想樓價升得太快，但又唔可以再出辣招馬上打死樓市。
所以我覺得內房股最好跌多啲，等佢跌深啲就可以吸納。巨股如中國海外，今年都係橫行，主要在20元至25元中間走動，呢幾個月在22.5元至25元中間走，現價23元，市盈率10倍，若等佢回到22.5元買，等幾個月有機會執10%。
另一隻恒大(3333) ，今年唔係橫行就係下潛，現價3.14元，市盈率低到4.1倍。不過股價低總有理由，佢隊足球隊剛剛攞亞冠杯冠軍，唔知市場係怕佢花太多錢搞波，還是怕佢盤數有事(佢舊年被香椽狙擊過)，股價平但有風險。
走勢較好的是碧桂園，今年反覆向上，現價5.31元，市盈率11.2倍，佢今年賣樓好好，廣東十里銀灘和青島十里金灘都大賣，呢啲盤都唔係在市區，地皮平，賣得好賺價多。
估佢今年簽約賣樓會首次過千億。恒大、碧桂園、中海外今年都有機賣樓過千億，但市場幾睇好碧桂園，上月佢在5元至5.7元中間走，若再有啲宏觀壞消息出來，等佢回到5元買，都有一定值博率。
陸羽仁
金融High Tea 舊文
