試水
2013年11月12日
中國十八屆三中全會今日閉幕，市場預計會後將係具體政策出台的密集期，內地華泰證券統計歷屆三中全會前後股市的表現，發現會議召開之後A股往往有較好表現，現在就係尋找受益板塊的最佳時刻，港股連跌多日後，於是都借勢夾番淡友一舖。
華泰證券列舉了幾個受益板塊畀投資者參考。首先係財稅改革，減少了重複徵稅的相關成本。受惠行業主要包括通訊服務及電腦行業。第二係金融體制改革，相關受益板塊包括上海自貿區、多元金融以及民營銀行；第三係資源價格改革，受益板塊主要係水電煤氣企業、智慧型儀器表以及鐵路等。
外資仲未定調
另外，有報道中國可能會放開「單獨二胎」政策，國家衛計委新聞發言人透露，改善生育政策是新組建的國家衛計委的重要職責。現在衛計委已經組織調研人口數量、素質、結構和分佈，研究完善政策的思路和方案。
「單獨二胎」是指夫妻雙方一人為獨生子女，即可生育第二個孩子。8月時有衛計委消息透露，「單獨二胎」政策有望在近期重啟，而關於2015年之後全面放開「二胎」的政策正在擬議中。呢個概念本來都幾吸引，美中不足係現時有質素的相關股份唔係咁多。
係三中全會舉行前，內地股市呈現不安情緒，主要係擔心會議提出國退民進，出來有打擊暴利國企的消息，令內銀等板塊持續受壓。內地在多年增長後，開始遇到中等收入國家瓶頸，如何能夠維持發展，有人認為答案在結構提升和改革，增加市場分配資源的作用，咁樣意味中央可能會以大力度去開放現在由國企壟斷的重要領域，包括能源、電訊、銀行等，同時會降低政府權力，減少審批等關卡，咁樣做除了改善營商環境，同時減少官僚貪污機會。
對於未來改革方向，市場原本擔心會衝擊大型國企的盈利，好似內銀股就首當其衝被沽售，但沽咗一輪後，大家見股價唔係咁跌到落去，又開始覺得呢啲巨企隻隻皮堅肉厚，點都頂得兩嘴，就算環境無咁好，但係咪代表好快就失勢呢？驚魂稍定下，好友就夾番一輪倉先。
憧憬三中全會將有利好消息公佈，加上美股上周五急升，恒指只係高開37點，一度甚至輕微倒跌，午後A股回穩，港股借勢炒上，尾市最多升380點，以貼近全日高位23124收市。恒生指數收報23069，升325點；國企指數收報10582，升192點，成交金額僅528億元。
昨日指數升得多，有點測試水溫味道，而家市場對三中全會仲未真係定調，個市彈咗一日，仲唔可以講話已經變番天朗氣清，最主要仲係要等外資點樣理解中央走出來的改革方向。
博雅唔難回本
昨日係「光棍節」，網購商借頭借路搞個購物節，今年銷情又報捷，科網股借勢已經炒起咗。揀正呢個時間，以網絡及手機遊戲德州撲克打出名堂的博雅(434) 今日掛牌。博雅獲7.7萬人捧場，超額認購832倍，係今年最火熱的新股。博雅以5.35元定價，較上限價低4.5%。認購1手(1000股)十個申請抽一個；認購30手或以上至可以穩得1手。
有消息指，收得560份認購上限的大飛，中籤率僅0.28%。假設大戶做9成孖展認購博雅頭槌飛，本金516萬元，7日利息成本約1.05萬元，博雅首日升7.6%就收得番成本，開波時應該唔難做到。
陸羽仁
金融High Tea 舊文
