宜炒不宜揸
2013年11月14日
中國三中全會閉幕，公佈經濟體制改革係全面深化改革的重點，處理好政府和市場的關係是核心問題。在阿爺未正式宣佈具體的經濟改革方案之前，大部份的投資者都唔敢妄動，消息公佈後，市場大部份人都理解為開放市場，衝擊國企，帶住個市向下。
對三中全會消息作負面解讀者，包括素有「牛央」之稱的西京投資主席劉央，卻變成H股大淡友。她在閉幕當日表示，恒指調整10%不足為奇，坦言已開始沽空港股。
睇得淡空軍發難
借完三中全會利好經濟消息欠奉，空軍一開市借勢發難，加上上證指數挫1.8%失守2100關，港股表現幾曳，全日瀉437點，以全日低位22463收市，炸穿徘徊已久的橫行區，成交增至逾600億元，恒指僅高於250天牛熊線(22401) 62點，場面都幾嚇人。建行(939) 、工行(1398) 及騰訊(700) 為跌市元兇，建行下滑2.8%，報5.8元；工行走低3.6%，報5.16元。
市場睇到咁淡，有時並非壞事，若果消息係負面，反映咗就可以再開局，若果唔係真係咁差，咁就有入平貨機會。陸羽仁認為，中央要加強市場機制，明顯係意識到過去幾年國進民退產生問題，希望作出糾正，在這個大方向下，要問的是力度有幾大，同落實步驟係點。
從會後公佈，北京無話要全面剷低國企，只係話要加強使用市場機制。現實上，任何搞經濟的官員，都不會希望搞到經濟大亂，引發衰退，如果用西方的比喻，現今內地的想法，有點似當年美國設立反壟斷法，打破巨企在電訊、鋼鐵業的壟斷，從另個角度，改革最終效果應該係激發經濟活力，至少從西方角度，應該會覺得唔係壞事。
細緻啲睇，而家習李政權要以強勢領導，習近平的作風唔係想搞到中央無晒影響力，政府完全失晒經濟話語權，呢種思維下，中央加強借助力量，唔係想打倒國企，而係想藉此強化國企以至整個經濟體系的底質，所以三中全會訂出的方向，係唔係真係要睇得咁壞呢？
有內銀股要執生
昨日內銀股領跌，主要原因係外界認為內銀會是新政下開刀的主要對象，呢個思維有其社會性，因為過去幾年民間對國營銀行放貸政策的確甚有怨言。銀行係百業之母，國有銀行控制住全國最主要的資金來源獲取厚利，對民企借貸採取不友善政策，在在都令她們成為眾矢之的。
國有銀行在市場自由化的風頂浪尖，基本經營環境有轉變，可以估計暴利和高增長年代將會結束，同時內銀股股價過去積弱，反映不斷消化緊壞消息，由於內銀股已經跌到價殘息高，尋完一輪底應會穩定下來，散戶對內銀股的策略，都要順應新環境作出調整。
按正路推測，未來內銀股表現，好可能跟隨好壞消息出現大型上落市，有壞消息時尋吓底，但因為股價已經好平，咁上下又反彈下。散戶買賣內銀股應改做「宜炒不宜揸」。
過去，好多人視內銀為長期買入對象，期望佢變成七十年代的匯控(005) ，三中全會後，散戶要視乎本身倉位作出回應，若然係組合大部份係內銀股，就必須伺機多元化組合，等股價反彈時套啲現平衡番；假如內銀股只係佔組合一部份，都唔需要當佢係結婚對象死攬唔放，適當時間就放出來游吓水，低位先再諗吸番。由於內銀股由高位跌落嚟，彈上彈落波動比較多，咁樣做個弄潮兒，假如你技術夠高能夠游上游落玩盡上落波浪，咁都幾爽㗎。
陸羽仁
金融High Tea 舊文
