跌市三重唱
2014年01月28日
美股杜指上周五暴瀉318點，港股ADR跌近500點，大市周一下跌已在預計之內。果然，恒生指數裂口低開431後，跌幅持續擴大，早市最多跌570點，藍籌股接近全面受壓，恒指孖寶自然難逃一跌，大笨象匯控(005) 成為跌市火車頭，全日挫2.7%，收報82.1元，一隻股已質低恒指95點；先前已明顯調整的中移動(941) 好啲，跌1.6%報74.95元。
港股插落嚟，經紀張打電話問，個市氣氛好似好差，使唔使即刻大斬纜？我話今次個市插落嚟，皆因中美兩大經濟體都玩緊收水，個市上落咗咁耐，現在咁樣插低，牛熊對決顯然係熊仔贏咗啦，不過，個市插得咁急，加上之前已經跌咗一浸，唔排除佢會有機會彈一彈喎，所以如果個倉揸得重，或者手持多數係內銀呢類弱股，梗係要減磅為妙啦，相反貨唔多，就可以等佢彈一彈先。
短線或彈 長線審慎
至於長遠點睇，陸羽仁就比較審慎。早前我係個欄多次講過美國債息由低位上升，迫近3厘水平，呢個係值得重視現象，因為買美債基本上係風險最低的投資，都有三厘回報，貨比貨之下其他投資工具自然要增加回報，即係話要價錢平啲啦。
唔好忘記的是，美國債息接近3厘話高唔高，話低唔低，佢同低位比1.7厘當然係升咗好多，但同金融海嘯前差不多4厘水平就仲有不少水位，所以將來要睇美國經濟可唔可以承受債息升到以前水平嘞，若果唔得咁就好啲，如果得的話，股市壓力就仲未消除喎。
呢一輪小股災，仲有一個因素就係新興市場包括阿根廷披索大跌，呢個係熱錢回流美國的表現。有中環茶友早前就講，要留意美國財政改善，甚至短期出現盈餘。美國財政改善代表美元好轉，容易吸引資金流入，喺咁情況下，新興市場愈亂，美元資產可能愈好，美股家受阿根廷披索貶值影響跌一跌，唔代表佢會一直衰，但美國唔衰，又唔代表新興市場唔衰喎，因為新興市場亂，熱錢會加快流回美國，所以美元資產好，顯示愈多錢由外面流入，反而代表其他市場未必咁掂。香港除了面對美債息升、新興市場貨幣貶值，仲多一樣就係內地都收水，形成推冧股價的「跌市三重唱」，呢三重唱一浸一浸嚟，壓力大時就質低個市，紓緩時就彈一彈，個市要真正好轉，就要等美息、貨幣同內地銀根三樣嘢有轉向跡象。
成份股仲有兩隻識升
喺三重唱下，恒指收報21976，瀉473點；國企指數收報9792，挫221點。成交金額增加至886億元。過去三日，恒指累跌1106點，國指亦挫達534點。好彩喺大跌市下，50隻藍籌股中仲有兩隻識得升，分別係升0.54%的濠賭股銀娛(027) ，以及升0.34%報59.95元的金沙(1928) 。
濠賭股上星期遭大行唱淡，股價隨即率先展開插水之旅，跌到七彩。兩大藍籌兼龍頭銀娛及金沙同樣走唔甩，前者五連跌，以昨日低位68.2元計，比起上周一高位84.5元足足跌近兩成；金沙好少少，連跌四日。兩者回升可能係先行喘穩，不排除一方面是之前跌過龍，另一方面則是農曆新年快到，市場又再炒作濠江賭場生意好。當然，亦有可能係小股災之下，投資者還是覺得濠賭股比較穩陣，紛紛出手低撈。不過，兩隻龍頭外，其他濠股就仍然向下。
陸羽仁
金融High Tea 舊文
