中環在線：金秀賢訪港迷倒財金女強人青姐朱太也追星 - 李華華
■金秀賢魅力四射，連財金界女強人都捧場。 葉君海攝
因韓劇《來自星星的你》爆紅嘅金秀賢，噚日應莎莎(178)邀請來港出席發佈會，「都教授」唔止迷倒名媛、少女，一班平日指揮若定、著重理性分析嘅分析員、財金界女強人都發動人情牌，爭取見金秀賢一面，當中就包括金利豐(1031)老闆娘朱李月華同埋股評人胡孟青。
金秀賢噚日喺尖沙嘴一間酒店出席發佈會，莎莎老闆郭少明請來幾百位朋友、嘉賓，當金秀賢一出場，全場幾百名女人同一時間尖叫、企起身，同埋舉起手機喪影，情況爆笑兼壯觀。
金利豐老闆娘朱太話係陪朋友去見金秀賢一面。佢原本冇留意《星星》，後來越來越多人講，佢先好奇走去睇，一睇就鍾意，指金秀賢飾演嘅都敏俊有錢、靚仔又叻，簡直係完美元素集於一身嘅男人，可惜佢冇機會同佢合照，只能遠觀。
■胡孟青形容金秀賢十分有禮。
■朱李月華話，金秀賢飾演嘅都敏俊有錢、靚仔又叻，簡直係完美元素集於一身嘅男人。
大行女分析員齊齊捧場
青姐聲稱，只係幫一位年約40嘅女性律師朋友去見金秀賢，順便當係參加上市公司活動，見埋莎莎老闆郭少明。佢話，冇辦法替呢位朋友撲多一張飛入場，惟有自己去拍片、影相，臨走拎走一袋紀念品，全部畀曬呢位朋友，真夠義氣。
青姐又話，平時工作忙，又要湊仔，根本冇時間煲劇，《星星》都係睇咗少少；見過金秀賢真人，形容對方十分有禮。
除朱太與青姐，至少仲有4、5位長期跟開莎莎嘅大行女分析員，專登去見金秀賢。聞說莎莎一共請咗十幾名財金界朋友，清一色女士，仲專門安排一行畀佢哋坐，位置屬中間偏後。
《唐唐母留影》
■城中名媛同唔到金秀賢真人合照，惟有同金秀賢嘅紙板合照，當中竟然包括唐英年母親唐尤淑圻。
傳邀男神食飯莎莎太子女食檸檬
今次金秀賢來港嘅活動，由莎莎國際(178)太子女郭詩慧(Melody)一手策劃。據路邊社消息所講，有傳Melody有意順便請金秀賢一齊食餐飯，但最後遭男神婉拒。莎莎原本仲想「爭取」金秀賢落銅鑼灣旗艦店巡舖，可惜最後大會以近日南韓發生海難為由，取消呢項行程。其實呢間旗艦店門外車多路窄，如果真係搵金秀賢過去，真係封幾條馬路都唔掂，所以去唔成，根本就係意料中事。
李華華
mailto:LiWaWa@AppleDaily.com
■有傳郭詩慧有意請金秀賢一齊食餐飯，但最後遭男神婉拒。
上一則: 樂香園：連葡提子都要網購 - 海迪
下一則: 中環在線：恒地林高演凍薪賺三千萬冠高層 - 李華華
中環在線 - 李華華 舊文
