歐洲股神逆向思維
2014年04月24日
內地經濟無起色，反映中小企業境況的匯豐中國製造業PMI連續四個月萎縮，4月初值仍明顯低於50榮枯分水嶺，加上中移動(941) 季績曳，拖累港股周三彈完即散。恒生指數高開125點報22855點，但已是全日高位所在，PMI數據公佈後，沽盤隨即湧現，大市掉頭向下，多日力守的一百天線終告跌穿。午後跌勢轉急，最多挫235點，低見22495點，最終挨近全日低位收市，恒指收報22509點，跌221點，惟20天線勉強失而復得。
華潤集團官方網站公佈，原招商局集團董事長傅育寧頂替宋林出任華潤集團董事長，華潤系內股份個別發展，華潤電力(836) 報19.46元，反彈2.53%，為表現最佳藍籌；華潤創業(291) 也回升1.37%，報22.2元；華潤燃氣(1193) 微升0.65%，報23.15元。
市傳騰訊(700) 及阿里巴巴入圍新券商牌首批試點，雙馬概念股逆市向好。騰訊全日升0.86%，報529元；騰訊早前入股的華南城(1668) 升2.81%報3.66元；宿敵阿里旗下兩大概念股文化中國(1060) 及中信21(241) 更雙雙爆升，分別急漲23.66%及9.5%，收報1.62元及5.07元。
講開科網股，踏入4月份，科網股好似由天堂跌落凡間，衰開有條路，買重中國科網股的富達基金，喺權益披露申報減持咗手頭的金山軟件(3888) 股份，賣出股份數目有212萬股，套現咗7150萬元，但經過今次減持，基金持股量由5.14%跌到去4.93%，以後減持毋須公佈。
買中國科網光榮退休
富達持有近半成金山軟件，可以話主要股東之一。呢個基金本來由有歐洲股神安東尼．保頓(Anthony Bolton)主理，佢本來早已經退休，但眼見中國出現經濟奇蹟，忍唔住技癢出手，結果因為押重注係民企身上，一度搞到基金輸大錢，無癮之餘宣佈今年退休。
係打骰最後一年，佢改變策略，轉為重注買喺中國科網股身上，呢一招果然奏效，令到基金係去年表現神勇，同時令佢可以光榮退休。
喺佢退休前夕，陸羽仁喺偶然機會撞到佢，問起佢對後市睇法，佢以巴菲特口吻答，通常人哋睇好我就睇淡，所以今年我睇好港股，因為家全世界唱通街，話要賣空新興市場嘛。被問到對內地科網股又點睇，佢就覺得價錢唔係貴，但佢不忘補充，科網股同任何股票一樣，當然都係要睇價錢啦！
如果用歐洲股神當時的說法，家好多科網股價錢，貴咗唔算好多，不過，有咗改變的是，家佢老人家已經享受緊退休生活，得閒玩吓音樂，隻基金已經俾接任人打骰；另一個改變係，好多科網股經過3月份的炒作，好多已經見過高價，就算公司基本因素無變，技術因素都唔同咗。
接班人換馬唔出奇
喺幾隻當炒科網股中，陸羽仁經常都覺得金山軟件係「概念股中的概念股」，點解咁講呢？因為科網股好多都係炒概念，博佢營運嘅創意過人，但金山軟件本身業務OK啦，即使有搭載小米手機搞遊戲，都唔值咁貴，大家炒得咁過癮，只係博大股東雷軍咁有創意，憧憬最後有大業務注入，好似係小米手機業務，所以你話炒呢樣係咪好概念化呢？
係金山軟件炒到飛沙走石時，雷軍就話過短期無意注資，而且最近內地手機鬥劈價，究竟富達減持佢，係基金經理投資哲學改變，抑或只係對個股睇法轉咗，要睇下佢仲有無其他減持行動出現。
正路嚟講，接得股神班，應該有番咁上下功力同自信心，如果係咁，當然無理由乜都唔做，繼續揸住個舊組合唔變，所以基金換吓馬不足為奇。如果佢無其他大動作，就較大機會只係覺得個別股票已經到價；假如佢接連再減持，就可能係代表睇淡呢類股票嘞。
不過昨日科網股反彈，金山軟件唔怕富達減持，升番2.4%。
陸羽仁
金融High Tea 舊文
