中環在線：許漢忠帶公關一姐走？機管局又要煩搵人 - 李華華
■許漢忠同將離任嘅公關Stephanie合作無間。
公關界又有人事變動。機管局大公關李雪珊(Stephanie)決定拜拜，好可能跟7月離任嘅行政總裁(CEO)許漢忠，差唔多時間離職。Stephanie話，離開機管局主要想花多啲時間陪伴兩名寶貝女，佢大女就快到海外升學，佢可能飛去陪阿女讀書都未定。
CEO人選未落實
Stephanie早於2005年做機管局公關阿頭，許漢忠就喺2007年初加入機管局，兩人合作無間。舊年爆出許漢忠涉嫌違規評標風波，Stephanie就出力幫手撲火。
喺港鐵(066)、機管局呢類極受公眾關注嘅機構做大公關，絕對係一項挑戰，唔使講得遠，齋睇港鐵最近就高鐵事件不停拆彈，就知呢份工唔易做，搞唔好就係公關災難；加上𠵱家本港政治環境複雜，機管局正計劃興建第三條跑道，牽涉資金、環評等多項因素，隨時拆彈拆到手軟。
查實𠵱家去機管局打工應該幾惡啃，否則冇理由咁耐都搵唔到人接替許漢忠做CEO。許漢忠舊年10月底話做到今年7月，超過半年都未落實繼任人選，就估到事情唔簡單。
據聞，部份人就係因為唔知將來主席係邊位而卻步，事關原本夠期嘅張建東延任至明年5月，本來大家預定「梁粉」羅康瑞將會接替做主席，點知張、羅二人不時開片，唔妥到出面，羅康瑞喺機管局董事局內勢孤力弱而敗陣，傳梁振英已打算安排蘇澤光做主席。
但一日未知邊位係老闆，又有邊個夠膽走入去做CEO呢？有起事上嚟，主席未必有事，佢就要提早宣佈不續約㗎喇。
董事局大換血梁粉或滲入
按慣例，機管局本月會公佈董事局新名單，事關董事局內17名董事，當中有八名嘅任期今年屆滿，其中兩名，包括立法會前議員何鍾泰與渣打銀行大中華及香港行政總裁洪丕正已獲續任一次，做咗六年。據政府不成文規定，公職任期一般唔超過六年，佢兩位好可能被換走。
另外六名董事喺2011年首度獲委任，之不過，當時梁振英仲未係特首，呢班董事都係前特首曾蔭權委任。梁振英會否伺機為機管局董事局來個大換血，換入更多「梁粉」屬未知數。
李華華
mailto:LiWaWa@AppleDaily.com
上一則: 樂香園：京東為阿里開路 - 海迪
下一則: 中環在線：安踏搵方力申曬肌谷「紅底」 - 李華華
中環在線 - 李華華 舊文
