魚樂無窮：大市回勇科網股秤先 - 唐牛
■魏中華(右)任主席的神州數字現價較高位插逾五成，博反彈空間十足！資料圖片
世界盃進入倒數階段，大行高盛都嚟湊熱鬧，用歷史數據整咗個世界盃預測報告。報告預期，四強球隊分別為巴西、阿根廷、西班牙同德國，最後巴西會喺決賽以3比1擊敗阿根廷，成為盟主。不過，大家唔好對呢個分析太認真(起碼唐牛唔會)，事關根據往績，四強總會有黑馬出現，例如上屆有烏拉圭，前屆有葡萄牙，2002年更加有南韓同埋土耳其。另一個不真實在於，報告預測嘅比數，除咗巴西贏喀麥隆5比0外，其餘竟然全部球隊都有波入，但當今足球防守重於一切，好難相信會有咁多士哥囉。
其實呢啲報告，喺股票市場都屢有出現，只不過形式唔同︰有線人畀堅料你，仲將故事鉅細無遺描繪，最終事實同劇情有幾多成相同，應該大家都心中有數。
噚日先講過港交所(388)異常硬淨，話口未完就炒上，成交更創滬港通以嚟新高，值得尊重。港交所乃大市寒暑表，意味港股短線有望突圍，同時成交突破700億銀，又多一個指標睇好，值得短炒博一轉。
金蝶神州數字走勢靚
博乜嘢股？科網相關股是也。點解？皆因好消息不絕─先有阿爺叫內銀唔好用IBM伺服器，國產軟件成為大贏家，拍住阿里巴巴大碼頭嘅金蝶(268)呈圓底走勢，短炒用3蚊做目標絕不過份。
支付股亦有鑊氣，全國首季移動支付業務金額狂升2.6倍，主打網遊支付嘅神州數字(8255)，似要突破杯柄，現價較高位插逾五成，博反彈空間十足！
唐牛
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk
上一則: 炒友Blog：寶馬暢銷新晨唔會差 - 邱古奇
下一則: 股場放大鏡：中銅成交激增有後著 - 歐陽風
魚樂無窮 - 唐牛 舊文
