青心直說：思捷有繼承者 - 胡孟青
■百麗CEO盛百椒三個月前才承認有結構問題，但前日竟然話自己「不清楚O2O在幹嘛」！資料圖片
老點聖手，即係坊間近年有如雨後春筍、專幫大戶派貨散貨又自封高人兼怪力亂神的股棍；點心聖手，就係當曬班炒股師奶old嬋係蝦餃燒賣小籠包的股壇火影忍者加流羅，兩者播弄市場的功力，與年賺逾40億元的鞋王百麗(1880)較量，簡直低幾班。
聖手通常施展掩眼法變魔術伎倆，利用唱好某公司，就算即推介即插水，只要施展苦肉計，表示自己亦買重貨，就可成為受害人之一，只怕前台真輸錢，先給你些少甜頭，再擺你上枱，只是用來掩護後面不為人知的不道德交易。靠吹上去散貨唔係最叻，神又係佢鬼又係佢，先行推高再搵件既自以為是又自甘墮落小嘍囉即推即插水、成為替死鬼，亦未必係最威。
過去一周平均每天沽空佔股份成交達三至五成的百麗國際(1880)，公司CEO盛百椒三個月前才自己爆響口承認有結構問題，時日如飛，今天在我心裏，是充滿不褪的記憶，前日你竟然跟分析員好清楚咁講，話「不清楚O2O在幹嘛」！究竟CEO係搽黑塊面唱衰自己推冧股價，抑或善意提醒股東，博大家欣賞其坦白會從寬？講呢啲！難怪投資者索性幹掉你！
學小輪後話齋，條友擺明想人嘔番啲貨出嚟畀佢，有圖有真相，百麗在淘寶和天貓都有好大的戶口，大老闆睜大眼講話自己唔識O2O，真係信不信由你！難道淘寶的貨源是員工偷出去放上網出售的嗎？百麗在淘寶的標價範圍在300至500元，高過網購同類對手的30至180元，冇競爭力，卻成功打殘自己的零售店。
百麗被上下其手
金融市場跟紅頂白，利字當頭，對你仁慈就係對自己殘忍，投資市場難有人肯苦心經營炮製win win局面。之不過，大戶又先下手為強，明刀明槍在8.2至8.5元範圍，持續個多月累積大量淡倉等食糊，上市公司又肯扮矮仔，大行自然手起刀落。
難怪曾經有酒腳聲大大咁話，對沖基金與大戶以前最鍾意攞住隻思捷環球(330)，先向上炒再向下質，貪其藍籌身份，大把貨可借之餘，又有足夠流通量(liquidity)，自從思捷被踢出恒指成份股，百麗已成為繼思捷後下一隻被上下其手予取予攜的最理想對象，貪其易借易還，醉眼看世界，原來可以很清晰。
胡孟青
獨立股評人
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk
上一則: 異動空間：炒反彈有糊要食 - 魏力
下一則: Prof J財技特訓班：有錢就係莊家 - 徐燦傑
青心直說 - 胡孟青 舊文
