魚樂無窮：炒股當旺的背後意義
■卓悅憑藉旗下一生良品強攻零食業務，一齊落鑊炒世界盃熱。資料圖片
噚日市場傳聞，騰訊(700)以每股1.5元入股星美文化(2366)，旋即發揮點石成金之效，後者半日炒高近六成，成交額達2億銀，相當於市值逾三成。午後公司喺網頁澄清未有同騰訊接觸，相信今日復牌屠殺場面難免。雖然炒家表錯情，但正正反映市場資金非常充裕，只係等待獵物出現，意味大市市底仍強。
卓悅也食世盃概念
世界盃本港時間聽朝開波，一眾概念股再度落鑊，阿信屋母公司CEC國際(759)飆升7%，adidas全球最大運動服供應商之一嘅永嘉集團(3322)亦升2%，至於透過旗下一生良品強攻零食業務嘅卓悅(653)，也衝高6%，明顯突破1.2元阻力，短線可向密集區1.4元進發。
本欄今日起將加設足智彩貼士環節，務求波股齊鳴。揭幕戰由主辦國巴西對克羅地亞，相信唔識波嘅都知巴西贏梗，但主勝僅得1.21倍，非常乏味。翻查往績，近屆揭幕戰都係細比數居多，相信與球隊需時熱身有關，從賠率角度出發，波膽巴西贏1比0(5.5倍)諗得過，讓球主客和巴西和(3.5倍)及入球細(1.9倍)亦可兼顧。
其餘特別彩池，唐牛暫時睇好科特迪瓦小組首名出線(4.2倍)，隊中不乏當打球星如耶耶托尼、謝雲奴，再加上野獸杜奧巴，攻力肯定不成問題。同組對手包括哥倫比亞、希臘及日本，亦非特別標青，科特迪瓦值得冷吼。
唐牛
https://www.facebook.com/tongcow88
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
唐牛
魚樂無窮 - 唐牛 舊文
