中環在線：證監追魂call問佔中
逼券商交應對方案
■多間大中型券商今個月開始收到證監查詢，猛咁問啲關於中環嘅假設性問題。
上星期五反對東北發展示威者衝擊立法會，加上星期日就係「6.22」全民投票日，「佔中」影響已經成為中環熱話，證監會亦好似越來越緊張，最近一星期不斷奪命追魂call多間大中型證券行，拋出大量假設性問題，要證券行畀出應對方案，最誇張係假設券商位於中環嘅辦公室俾人大肆破壞咁點算！
「辦公室被破壞點算？」
多間大中型券商本月初開始收到證監會嘅查詢，最搞鬼係，證監會嘅代表絕口不提「佔中」呢兩個字，但係所有假設性問題都係衝著佔中而來。多間已經回覆證監會嘅券商，本周竟然又多次收到證監電話查詢，明顯係證監會唔滿意佢哋之前畀落嘅方案，要佢哋畀出更加具體嘅應變措施。
有證券行老闆講，證監會近兩個星期已經打電話去兩、三次，證監點都唔講佔中，但係不斷追問多條關於中環嘅假設性問題，包括如果入唔到中環辦公室點樣處理交收？如果有銀行俾群眾圍住做唔到生意點解決？如果寫字樓俾人破壞到完全運作唔到又有乜影響？
問完前線問後勤
另一間證券行老闆都話，俾證監會打電話問咗兩次，「上星期問完前線，今個星期就問後勤，佢哋冇咁蠢嘅，隻字唔講『佔中』，但明眼人都知為乜啦」。佢話，其實佢哋啲伺服器已經做好分流，就算中環冧咗，客戶做買賣嘅問題都不大。
至於證監最緊張嘅交收問題，就因為實施遙距控制好耐，就算交收機喺中環，都唔使去到先做到，「就算死曬機，咪親自去交易所嘅交收機做囉」。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
