金手指：一注獨沽的士牌
聽講Uber將正式來港開業，到時將打殘的士收入。資料圖片
呢幾日，孫柏文一路都見到call車公司Uber嘅消息，聽講佢哋會正式來港開業。不過呢啲報道，只提及Uber用靚房車、關於其他call車app、列出Uber收幾銀，又或者其他地方的士佬上街反Uber等消息，卻完全唔講Uber最煞食嘅地方。其實Uber唔係一個科技故事，而係一個將資源運用得更有效嘅工程學故事。
任何運輸服務，最重要三大成本，就係燃料、人工和車價。人工同車價就定咗，載唔載客都要畀。在夏天，一部冇客的士喺街等都會燒油，所以運輸公司最好就係永遠載緊嘢。Uber最勁嘅地方，就係透過彈性收費，盡量令車隊永遠載緊客。冇客時會平，多客時會貴，不過收費應該啱啱好，唔會有人肯出價而冇車，亦唔會有吉車。你可能話，的士都有八折黨，打風都有「照錶加兩百」啦！問題係，你打電話講照錶加溢價，都係估估嚇，Uber嘅電腦就用程式令需求同供應永遠地脗合，你話邊個贏？所以其他的士業冇香港咁有彈性同平(香港的士收費真係好平)嘅地方，已被Uber打到啲司機要上街示威。
昨日睇最新市區的士牌交易價，差不多700萬元一個牌，乘以15,000個牌，就等於千幾億。Uber最新一次融資，係用1,300億元市值作價。差佬拉啲載客嘅私家車，好多時都係用「冇啱嘅保險」來做理由，而1,300億元嘅公司唔會犯呢個錯。當你可以摧毀及取代原先要700萬元買牌先做得嘅生意，屈機空間就值700萬元。睇啲的士牌主討論區，發現越來越難搵司機租車。
Uber殺到租金勢跌
下次經濟下滑，係咪真係會有人因此入行揸的士？定係寧願做Uber旗下嘅司機呢？的士牌租金回報現時三厘幾，到時冇司機、司機收入又俾Uber打殘(舊金山的士牌主每更收入按年已跌一成幾)，租金進一步下跌，的士牌回報岌岌可危。多唔使講，有牌電訊商喺千禧年代初靠短訊搵好多，WhatsApp、Wechat出現後又點呢？仲唔一注獨沽的士牌？
孫柏文
獨立股評人
http://facebook.com/shuen
本欄逢周二刊出
金手指 - 孫柏文 舊文
