老外老細５
2014/6/24 上午 09:32:34
網誌分類: 經濟
美國昨日公佈的經濟數據，無論係5月經濟活動指數、二手房銷售及6月預覽版採購經理人指數(PMI)都好過市場預期，理應利好股市。不過，在美股連漲六日之後，加上外圍股市都弱弱雞雞，有投資者趁機獲利，沽壓不低，但美股的確硬淨，標普500指數上午跌少少，已經見到有買盤追入。尾市基本上追番所有失地，收市1963點，近平手收場；杜指收跌10點至16937點；納指更係由跌轉升，收市報4369點，微升1點。
美國經濟昨日好消息頻傳，芝加哥聯儲地區5月份的經濟活動指數從4月份的負0.15攀升至0.21，好過市場預期，表明經濟活動增長正在加速。而同期的二手房銷售量增長4.9%，年化數字攀升至489萬幢，高過預期的475萬幢。亦高過4月經上調了的466萬幢。有分析解釋，二手房庫存增加和近呢幾個月抵押貸款利率又回番少少，推動了二手房銷售增長。另外，美國就業狀況好轉，美國買得起屋的人增加，亦係二手樓市改善的原因。屋價方面，5月二手房售價的中位值為21.34萬美元，較去年同期增長5.1%。5月二手房庫存為228萬幢，相當於5.6個月的庫存。
另外，美國6月份的Markit預覽版採購經理人指數攀升至57.5，創2010年5月以來新高，也好過市場預期的56.5。其中的子指數當中，産出指數連續第三個月上漲，訂單和雇傭指數亦較上月增長。
中國及歐洲昨日亦公佈PMI報告。匯豐銀行中國製造業指數攀升至50.8，創8個月新高，反映中國製造業正由萎縮轉為增長。但歐元區就唔係幾掂，6月份的製造業與服務業連續第二個月下滑，歐洲股市昨日走軟，法國及德國股市都跌超過0.5%。
製造業改善，加上李克強總理表示有信心完成今年7.5%的增長目標，都有助提振市場對於中國經濟前景的信心，但A股卻未有因為而造好，上證綜指微跌0.1%至2024點。而最最「玩嘢」係恆指，朝早抽高200高點至全日，中午企穩，以為仲有進賬，午後忽然變臉，大插水超過460點至近全日最低位收市，跌穿23000點，收22804點，大跌389點。經紀張話昨日唔少散戶睇住匯豐PMI咁好買貨，結果一頸血！朝早追入固然慘，勁輸589點，中午見到恆指已經回順150點，以為有機，結果亦要輸超過450點！個市插咗落嚟，炒低一級，唔係咁易玩。
繼續講吓那個辦公室血拼的續集。網友大笨袋鼠留言話:「老實講，陸sir你講嘅三個人之中，單睇你嘅形容，有選擇嘅話，袋鼠都只係會想搵阿Jack做拍檔、或代理辦事！唔理上司同你扮friend、定真係friend，都唔應該鬆懈自己嘅公事，最終都係要辦事妥當、交到數吧。(不過那位仁兄，連溝女史都要出賣埋又陰功啲)。話唔定David唔單止有手段，亦已經睇清啲人嘅能力，叫你個做得嘢嘅friend交數，只係弊在一時意氣風發、以下犯上；跟住諗住個John只係過渡人物，踢走佢之後，先至可以升無名牌背景嘅Jack？」
每個人心中都有一個好朋友，一個壞朋友，好朋友好理性，叫你做應做的事，規規矩矩，謹小慎微。壞朋友率性而為，叫你做開心之事，並無章法，魯莽行事。故事中的老細David，就係被好朋友同壞朋友一齊影響緊佢，好朋友叫佢交業績，所以要搵我朋友或阿Jack那類人做嘢，壞朋友叫佢浦老蘭去打波，其實阿John最啱佢。佢搵我朋友或阿Jack做正經嘢之餘，亦逼人陪佢去老蘭(後來更去私竇)。但佢顛唔曬，骨子裏深明唔交數自己無運行，最後都要搵阿Jack呢類人去跑數。
至於我朋友生日收到Ex老細David送來一枝Château Lafite Rothschild，大感驚訝之餘，David電話就到，就在秘書話「line one Mr. David Lee找你」那1秒，我朋友有啲慶，想同秘講:「話我唔喺度!」但呢句話到口唇邊又吞咗，心諗「睇吓你玩乜嘢。」呢個電話帶來一個飯局。
坐在中環最貴的意大利餐廳內，朋友報復性地叫了一枝唔平的紅酒，聽著David吹水，話唔好意思當日對佢咁差，主要係美國總部壓落嚟要交數所致。朋友知道呢啲理由都唔係事實，但亦忍住度氣做聽眾，久不久搭句口話「唔緊要啦我而家在歐資行落咗腳都OK啦。」
食完餐飯，只係好似有一個friend番的感覺。不過我朋友經過被逼走一役，開始明白David外表似鬼佬，其實城腑極深，其實出一枝紅酒一餐飯，想買番一個「friend(朋友)」，想呢個「friend」唔好到處唱衰佢，同時亦收吓歐資行的行情。朋友亦成熟咗啦，出得嚟行，多個朋友好過多個敵人，在離席時留咗一句:「你一日係我老細，一世係我老細，呢個世界咁細，我都好想有一日你做番我老細呀。」一句客氣之言，David十分受落，又點估到8年後大家真係在同一間銀行打工呢?
陸羽仁
回應(5) 我想回應
陸羽仁 BLOG 舊文
