異動空間：樂極生悲方程式
葡國最大上市銀行爆發信貸危機，但全球股市反應不大，可能經歷金融海嘯、第N次歐債危機後，投資者已經嚇慣咗，銀行違約有乜好怕喎！就算出事，歐央行都會救，仲一定救到。大部份人相信係咁諗，加上港股計落真係平，形成唔上唔落。不過，危機從來都是意想不到，魏力曾收過風，話某股賣盤，連買方、作價、每股價錢，邊一日會出deal一清二楚，但當晚等通告等到11點，而股價就徐徐向下，究竟你會信幅圖止蝕，抑或堅信消息真確？最後單deal無疾而終，股價跌六成，信者統統失救。
再舉個例，早排同班朋友傾開買樓，P君言之鑿鑿，話樓價「冇得跌㗎，家陣唔買，第時仲上唔到車呀！」其理由不外乎是「經濟好、需求大、供應少」。居然敢話一樣投資只升不跌，聽到就驚。自住唔怕跌，應係目前上車的理由，但當你發現層樓唔見三分之一，仍要死供爛供，相信點都唔開心。認為未來表現會跟隨目前走勢，屬投資一大死穴，齋睇圖炒股易中伏，正因如此。多留意行業新聞，比較同業表現，再配合技術分析，才能及早聞到燶味，於危機爆發初期逃離災區。
魏力
http://www.facebook.com/2012jason
魏力
異動空間 - 魏力 舊文
