魚樂無窮：完成收貨暢捷通起飛
■王文京任主席的暢捷通獲基金密密增持，蟹貨亦幾近消化完畢，前景可睇高一線。資料圖片
半新股暢捷通(1588)連日潛水後，上周五一度重上招股價，從基本因素、公司估值、炒作概念、大戶手影及圖表走勢五大方面出發，均值得投下信心一票。暢捷通為內地小微企業軟件及服務供應商，收入來自銷售軟件產品、提供服務及銷售採購商品，由內地A股軟件龍頭用友分拆出來，後台贏曬。以收入計，公司中國小微企業軟件市場佔有率達3.8%，為全國第一。雲端服務日益重要，成為未來業務主戰場，以其龐大客戶群，一旦修成正果，利潤將以幾何級數上升。
事實上，根據工信部發佈嘅《軟件和信息技術服務業十二五發展規劃》，預計到2015年，中國軟件業及IT服務產業總市場規模將達4萬億人仔，分到少少餅仔已經好和味。
保薦人國泰君安估計，現價預測市盈率約22倍，較同業金蝶(268)以及母公司用友嘅25倍，折讓超過一成，抵博！阿里巴巴即將招股上市，資金為迎接巨無霸，一定會炒旺科網股個場，暢捷通坐享其成，正嘢！
大戶瘋狂掃貨
公司雖然連日潛水，不過基金卻密密增持，當中又以UBS最積極，由首日掛牌開始不停掃貨，持股量由13.28%極速增至16.1%，場內亦有美銀及Rays Capital搶貨，大戶用真金白銀支持，信得過！睇圖表，暢捷通上市以來呈圓底走勢，上周五突破頸線兼創新高，收報16.34元，升4%。短期收貨活動應已完成，蟹貨亦幾近消化完畢，短線先睇18元！
唐牛
https://www.facebook.com/tongcow88
唐牛
魚樂無窮 - 唐牛 舊文
