博炒不必急
2014年07月17日
市場焦點又落入聯邦儲備局主席耶倫身上，佢唔單止評彈經濟，仲做埋財經演員，話有幾個板塊嘅股份股價偏高，呢次出口術仲勁過當年佢前輩格林斯潘，話股市有非理性亢奮。耶倫一句，細價股、生物技術和科網股的預測市盈率「與歷史水準相比較高」，令到相關股票受壓，以這些股票為主的納指跑輸大市，周二收市跌了24點。
改革股浮沉多年
有分析話，耶倫一路話經濟表現唔差，一面爆響口話有幾類股份估值偏高，有學咗格林斯潘出口術之嫌，此舉係咪代表佢唔想咁快加息呢？
呢排內地因素對個市影響似乎明顯咗，內地次季經濟數據理想，帶動港股一度上揚103點，高見23562點。惟內地股市掉頭向下，港股亦升勢不保，幸10天線(23414) 有支持，大市回升，尾市更重上23500點收市。恒指收報23523點，升63點；國企指數收報10475點，跌13點，成交534億元。
國企改革概念股持續升勢，中國建材(3323) 揚3%，造7.8元，為升幅最大國指成份股；中糧油(606) 漲2.4%，造3.46元；中糧置地(207) 飆5%，最勁係國家開發投資公司旗下華聯國際(969) 收報0.5元，狂升0.155元或44.9%，升幅是港股最勁。不過，中國食品(506) 回吐0.15元或4.5%，造3.21元；國藥(1099) 都微跌。
市場搵概念炒作中資股，重組改革係其中一樣。中環茶友話，最先爆出呢個想法係中石化(386) 董事長傅成玉。由佢爆料到?家，中石化股價升咗唔夠一成，唔算多亦唔算少，以上半年國企表現麻麻計，買佢回報算係OK啦，不過，如果大市繼續上，就要睇佢有無料繼續到啦！
中石化係下游企業，喺能源產業鏈比較蝕底，買佢博炒，茶友話勝在「㩒地游水」夠穩陣，唔會浸死，佢咁多年都保持派息，同家炒緊重組嘅中糧系都有啲似。
幾年前，曾經喺華潤集團大展拳腳嘅寧高寧過檔中糧油，曾惹起市場不少憧憬，可惜內地糧價受嚴格管控，加上價格低迷，該系股份長期浮浮沉沉。去年中糧油曾經供股，之後搞到一度破底，小股東嘅股海旅程唔算愉快。
手機股輪流出擊
中糧油情況同中石油(857) 有點相似，就係大件夾抵食，股價仲算低位，而且規模有番咁上下，如果集團引入民間資本，相信不少國際性糧食巨企會有興趣入股合作，問題係食品價格關係社會穩定甚至國家安全，咁中央係咪願意放棄控制權呢？所以佢有無料到，仲要睇阿爺係咪大膽放手畀佢任搞，股民有興趣博炒番份，都未必要急追。
另一類有炒味嘅股份係手機相關股，昨日炒同內地小米有關的公司，消息係佢夥拍印度最大網購公司Flipkart，銷售多款小米手機，刺激小米概念股彈出，代工生產商通達(698) 最受惠，收報1.18元，大升10%；時捷(1184) 亦勁彈7.5%，收2.57元。
手機股家分成兩大類別，一類係內地手機，包括有自主品牌的酷派(2369) ，另外仲有同小米相關的生產商。
另一派就係同蘋果有關的股份，蘋果本來話喺8月份推出新型號iPhone，最新消息話會延遲。同iPhone有關的工業股好似富智康(2038) 、瑞聲(2018) ，都係睇住新產品消息嚟炒，估計無論小米抑或iPhone概念，應該都無咁快玩完。
陸羽仁
金融High Tea 舊文
