炒到內房
2014年07月24日
港股前日大升四百幾點創新高，升開唔畀佢停，昨日再上兼且成交增加，似乎有借內地股市好轉之利，有不夾到淡友投降都不回頭之勢。
美國6月通脹低過預期，美股杜指再攀升，連帶港股周二打破悶局抽升逾300點後，動力依然十足，恒生指數再創今年高位，全日升近200點，挨近24000大關收市。大市交投持續暢旺，全日成交增至近798億元。
指數雖然升唔少，但並非雞犬皆升，暫時仲係炒住啲正路大股，掛頭牌係中資股份，其他炒股就好個別發展，有部份仲係升市下跌，呢個情況同美國差唔多，美國杜指同標普500指數創新高，但主要反映中小型股走勢的羅素指數，就無呢兩個指數表現咁好。如果從港股睇，咁樣反而令人放心啲，反映咗入市資金唔係咁急，同買家質素仲唔算太差。有茶友話家應該用咩策略？我答個市係有資金郁緊，但未算太強，主要係美國不斷創新高，如果內地市好番啲，咪有錢炒囉，咁環境有資金在手就順住個市炒，有錢先炒大股，跟住炒啲落後股博走位都得啦。
落後內房有運開始郁
睇返香港個市，昨日藍籌大股就普遍向好嘞。大市成交增，港交所(388) 漲1.34%報159.1元；中國移動(941) 微升0.9%報84.1元；中海油(883) 升1.17%報13.88元。不過旺旺(151) 就畀麥格理唱淡，股價跌3.63%造10.62元，是表現最差藍籌。
至於落後股，一直想講內房，內房係脆弱板塊，昨日有報道指，內地十多個城市將取消限購，內房股有運行開始郁嘞，大股如萬科(2202) 升5.7%；中海外(688) 升4.4%；碧桂園(2007) 升4.5%；恒大(3333) 升少啲僅升1.2%。個市唔跌，落後內房會追住炒。
阿里「背景論」批評唔會少
阿里巴巴「摘吉」在美國上市，是非隨之而來，美國《紐約時報》前日盤點阿里巴巴的「紅背景」，認為阿里與太子黨關係微妙。阿里昨日高調反駁，認為《紐時》的報道是「錯誤描述」、「自我立場上的推斷和想像」。
《紐時》前日的報道，提及阿里股東，包括國家前主席江澤民嫡孫江志成執掌的博裕資本、國務院前副總理曾培炎之子曾之杰任職過的中信資本，以及中紀委前書記賀國強之子賀錦雷曾任高層的國開金融。
阿里昨日直斥《紐時》的文章，對其個別股東作出錯誤描述及個人傾向明顯的推斷，並強烈反對媒體屢次提及阿里的「背景論」。阿里昨日在微博發聲明，解釋當年引入博裕及中信等因由。阿里表示，截至今年6月30日，博裕資本、中信資本及國開金融，分別持有阿里0.55%、1.1%及0.47%普通股。阿里指出，2012年為回購雅虎股權，公司進行了融資，在全球市場低迷，無人敢投資阿里的情況下，三間公司「基於對阿里的信任、理解及信心」認購股份，仲話阿里「我們唯一背景只有市場。外界強加於公司的各種所謂背景，以前沒有，現在沒有，將來也不需要！」。不過，《紐時》係政治大報而唔係財經大報，佢家咁多動作，將來阿里掛牌後還會少嗎，更仲何況公司上市搵咗國家政協副主席董伯伯做董事！
全球最大豬肉生產商萬洲國際(288) 4月來港上市觸礁後，明日起重新招股，計劃發售25.6億股，當中5%在港公開發售，下周二截止認購，集資額減半至約158億元，招股價6.2元，每手入場費3131.25元。家個市升番，佢又減價，今次買肯定平過上次，問題係豬肉股表現今年令人唔係幾開胃，大平賣作招徠睇吓得唔得！
陸羽仁
金融High Tea 舊文
