打底好過死谷
2014年08月15日
港股在25000點阻力真係唔少，趁住內地A股回吐，港股升穿7月底高位後就腳軟，午後曾吐近170點，收市最終僅跌不足100點，睇個市打底似乎仲未夠，正路應該上上落落消化吓，好過夾硬谷上去。
公用股可食吓胡
兩大藍籌公佈業績，雖然有大行對中期業績看好，騰訊(700) 仍難逃好消息出貨，股價收市跌咗2.3%，收報130.1元，單是騰訊已拉低恒指53點。另一隻中移動(941) 中期純利減少8.53%，算係市場預期較佳幅度，收市股價升0.95元，收報88.3元。
宣佈業績的公司仲有中電(002) ，集團除了海外業務，今年本地業務增長都有7%增長。早前政府就能源組合提出諮詢，露出與中國聯網的傾向，若然成事對兩電有負面影響。不過，由於煤價向下，有利中電降低成本，減少本地政治壓力；加上美國債息跌到新低，令到兩電股價雙雙創出一年新高。不過，美國債息已經去到偏低水平，唔易再大幅下跌，手頭有公用股者，不妨食啲股，等自己開心吓，兼攞番啲本睇吓有無其他機會！
個市升到高位，開始有抽水行動，市傳中石化(386) 悉售中國燃氣(384) ，中燃大手上板，每股作價14.8元，比前日收市15.6元低5.1%，共涉31億元，股價昨日收報14.98元，跌咗4%。
另外兩塊住宅地前日批出，價錢低過預期，但對市場信心好似無影響，投到地的宏安(1222) 股價仲炒上一年新高。樓價貴、地價平似乎變成「合理現象」，地產股股價翌日普遍企穩。中環茶友認為，咁同梁振英放棄高地價政策，賣地基本上不設底價，令樓價未跌地價先跌好有關係。
賣地差變咗好消息
好多人話現屆政府同發展商關係麻麻，但茶友睇法略有不同，佢話以前政府行高地價政策，樓市下行，當局都要企硬守住底價，寧願減少賣地，變成夾死發展商，家發展商控制住新樓供應同買地，一邊手高價賣樓，一邊手低價投地，不斷沽出手頭高價買入的存貨，經過呢一輪小陽春出貨，佢哋又鎖定咗一批收入。本來，發展商早兩年入咗貴地，隨時要減值，現在呢個需要就降低咗啦，聽佢咁講，就明白點解呢排地產股咁硬淨，同埋賣地成績差可以係好消息。
發展商近日瘋狂沽樓，好似長實(001) 樓神趙國雄就透露，集團上半年的售樓總額約191億元，進度理想，仲話「年初設定的全年銷售指標300億元已完成在望」。
佢透露，下半年的推盤步伐不會減慢，共涉最少三個盤，提供約2594伙。重點推將軍澳緻藍天，共提供逾1600伙，最快有機會於本月底至下月初開賣。
倘嵐山II期及紅磡利工街項目的預售樓花同意書可於短期推出，集團都會盡快推出。由於年內將會推出大圍站等地皮，跟住投地機會較大。長實係各大發展商中，係最講求銷售效率的，去年公司賣樓不達標，點知今年樓市爆上，俾佢高價標會，有子彈係手，相信佢會睇定先食。
地產股升咗唔少，要在佢哋身上搵錢唔易，莫勿高追，只宜低吸。
陸羽仁
金融High Tea 舊文
