炒炒滬港通
2014年08月04日
港股真係幾硬，上周四美股杜指大跌317點，港股都好似唔想跌咁款，上午跌少少，下晝跌多啲，最後跌224點，跌幅1%都唔夠，遠少過美國。到周五美股杜指再跌69點，但已從低位反彈，估計對港股壓力也不大。
港股上周五硬到咁，表面睇係因為內地個市無乜點跌所致，到下午兩點幾接近內地收市時，港股的跌幅開始擴大一點。不過我覺得，只係講內地市呢個解釋未係好足夠，因為如果香港個市好差，一開始就插400、500點，然後沽壓不斷，香港市係有條件帶住內地市跌，但香港當日一開市已經唔太想跌，所以中港兩地都無乜跌市氣氛。
周末同中環茶友飲茶，都覺得大市有人睇淡離場，但亦有人睇好，好以上月期指結算日都有一大批好倉食咗胡，但到上周五繼續有人趁低買貨，令個市跌唔落去。有茶友話，撇開陰謀論唔講，家市場上有咁多好友，其中一個推測，係唔少人在炒10月13日開通的「滬港通」，雖然大家都知滬港通有限額，初時影響有限，但始終意念好新，有炒作噱頭，最好喺先前炒上，到件事實現，散戶眼見為真，到時開始入市接貨，那時大戶派貨都未遲。
耶倫手軟 美股未散
我話若然如此，家先係8月，仲可以炒多兩個月？咁當中若然美股下跌又點？有茶友搭咀，上周三聯儲局開完會，主席耶倫搞出來的調子真係非常鴿派，到上周四都係市場無端端自己驚啫，無人話要加息呀。到上周五美國公佈非農業就業職位增長，只有20.9萬個，唔係驚人地高，市場又會安心啲。所以9月聯儲局開會前，美股可能會調整吓，但又未到大崩盤的時候。
我就話個市升咗唔少，講投資「好股」都有啲貴，只係「衰股」仲便宜，投資想買好股，好難下注，唯有投機炒吓落後股有得睇吓。
莫看香港好似市道好好，但在港做生意愈來愈難，無乜行業好做。睇吓長實(001) 同和黃(013) 就知。長實及和黃上周四收市後公佈業績，雖然李超人再次慷慨派息，長實及和黃的中期息齊增長10%，分別是0.638元和0.66元。但市場對兩股睇法各異，上周五長實跌4.7%，收143.6元；和黃微升0.2%，收106.2元。長實同和黃業務都好國際化，但相對地，長實還有很多香港地產業務，市場就比較睇好和黃。
長實講明 不急買地
可以逐個講講佢哋的業績。長實受惠於子公司電能實業(006) 分拆港燈(2638) 獨立上市，獲80.3億元的一次性收益，長實半年純利213.5億元，上升59%；每股盈利9.22元，上升59%，中期息增加10%至每股0.638元；攤佔和黃業績前的核心溢利為71.4億元，按年下跌1%。
長實主席李嘉誠於業績報告中表示，集團上半年整體業績理想，今年首6個月，香港物業銷售收益為46.73億元，按年升22%，內地物業銷售收益則較預期為低。長實今年上半年經營溢利上升，但投資物業之公平值增加少於去年同期，但業績維持良好。
摩通出報告話，長實撇除攤佔和黃收益的盈利，較他們預期低8%，主要由於長實的內地房地產銷售貢獻較低，本港部份交易又延遲入帳，不過因為長實攤佔和黃盈利明顯上升，故上調今年盈利預測24%，明年盈利預測5%。
報告引述長實管理層話，集團現時在中港兩地都不急於增加土地儲備，因業務已開始分散，而中港兩地地價亦有向下趨勢，管理層指現有中港土地儲備，足夠未來分別5年及4年發展。
摩通亦指，長實已成功分散業務，而中港房地產業務將成長實部份業務，雖然樓價銷售短期仍會主導長實股價，但相信未來新投資將為集團重點。摩通維持「增持」長實評級，微升目標價至165元(上周五收143.6元)，不過，摩通指長實目前估值已見頂，相信股價會跟隨市場氣氛調整。另外樓市氣氛改善，將可帶動長實股價向上升。
飛機公司 成為目標
里昂就睇得淡少少。里昂話，長實稅前盈利按年升7.8%至82.8億元，比該行預測升幅2.5%為高，主要是來自和黃的盈利貢獻比估計多。長實近幾個月表現明顯優於和黃，但對長實跑贏和黃的看法逐漸淡化，又認為長實有足夠的彈藥收購，但估計長實短期內不會有大型收購，現時其估值達到高位，股價表現將較慢，因此將長實評級由「買入」下調至「優於大市」，並從確信買入名單中剔除。但市傳長實有意出價390億元，競購海外的飛機租貸公司
反觀和黃半年純利284.4億元，較去年上半年上升1.29倍，比市場平均預測278億元略高。如若撇除將港燈分拆上市所得收益等特殊因素，經常性溢利為135.2億元，增長13%，也勝過市場預期的127億元；每股經常性盈利3.17元，派中期息0.66元。
和黃業績 優於預期
期內和黃3G業務進一步增長，尤其是意大利的3業務，有較好表現所致。歐洲3集團錄得未計稅項利息折舊收益(EBITDA)增加15%至65.4億元。赫斯基能源溢利為12.9億加元，增長13%。港口及相關服務部門吞吐量增加5%至3960萬個標準貨櫃，EBITDA增加4%至56.7億元，主要由於歐洲分部，以及內地及其他香港分部於今年上半年表現強勁。
地產及酒店部門EBITDA下降35%至38.73億元，主要由於上半年銷售額下降，但經常性租金收入有增長。至於零售業務，在25個市場共有10812間店舖，半年增加231間。EBITDA為66.11億元，增加9%。睇番和黃除了地產一樣唔得之外，其餘樣樣都得。
好股難求 長揸略貴
摩根士丹利發表研究報告，指和黃核心盈利僅135億元，升13%，雖然稍高於他們預期，但增幅仍是4年中最慢之一。大摩話和黃未來仍須努力，由於出售了屈臣氏25%股權，預料下半年和黃盈利增幅僅錄單位數增長。大摩指出，和黃目標將提升每股盈測至10元的期限，由明年延至後年，因為內地物業銷售疲弱及出售部份屈臣氏股權。但大摩認為，中期而言，和黃負債比率改善、意大利3G業務發展及屈臣氏有上市可能，均帶來期權價值。大摩因而維持和黃「中性」評級，目標價104元不變(上周五收報106.2元)。
摩通睇得好啲，認為和黃上半年業績與該行預測一致，相信集團會活躍運用資金，為投資者帶來回報，認為和黃的估值不高，以及受惠已發展市場的復甦，可望有重估。摩通予和黃「增持」評級，目標價133元，比起資產值156元有15%折讓。
睇完長和業績同市場反應，可知真係好股難求。其實長實同和黃都算係咁啦，過去一年，和黃根本係守住一條上升軌係咁上，無乜大回頭，家嘅缺點係股價較高。長實雖然係半隻地產股，但正如我早在佢派特別息時所講，長實派特別息派到同和黃咁高，好明顯大老闆想長實股價上啦，首富地位，誰能代替？長實在2月穿106元後就見底向上，升咗5個幾月都無停，香港地產市道又係有限公司，雖然長實都賣到樓，但買地咁窒手，市場都有啲擔心，所以一見業績唔係特別標青，就沽番少少長實先，升咗咁多食胡都好正常。
總括來說，長實和黃雖好，但長線投資者好難高追，只能等顯著回落時，才好入貨。短線客當然可以走吓波幅，先睇睇長實跌得夠唔夠深，先知有無水位走啦。
陸羽仁
金融High Tea 舊文
