異動空間：京信4G大茶飯
個市連彈三日成交卻持續縮減，反映過去一個月跌市已有大批蟹民，基金大戶亦不能倖免，資金綁死曬，喪失博反彈能力。以手機股酷派(2369)為例，7月以來急瀉41%係殺人跌浪，過去兩日零反彈，顯然反映基本因素惡化，出貨量差過預期，加上中低檔智能機競爭大，毛利率勢將受壓。內幕人士在7月市好時開始出貨，派到一街都係，反彈自然困難。
同行舜宇光學(2382)及比亞迪電子(285)就靚仔得多。舜宇手機鏡頭技術領先同業，下半年換機潮勢帶動盈利爆升，美林最新報告睇17.6元，現價買仍有41%水位。比亞迪電子則善於生產金屬手機外殼，食正時下潮流，摩通指，三星新機A5及S6將用金屬殼，前景睇高幾線。彭博綜合預測，比亞迪電子今年純利增長67%，預測PE16倍，相當合理。都係?句：炒股貪平又畏高，足以致命。另一隻浴火重生電訊設備股為京信通信(2342)，半年轉賺7,200萬元，恢復派息，再10送1紅股，大炒格！強國4G基站發展如火如荼，京信盡攬三大電訊商定單，正到痹！趁市況企穩，京信走勢再現突破，先睇4.50元。
魏力
http://www.facebook.com/2012jason
魏力
異動空間 - 魏力 舊文
