打新止痕
2014年10月08日
佔中陷入膠着，個市繼續反彈，而且個別板塊同好多股份都乘機殺上，湧出一陣陣炒味。
中環茶友聚會，仲係講佔中多過講個市。有茶友問，呢兩日上街人數好似少咗，係咪可以趁「低」吸納呢？
政治市變得快
對於呢個問題，若然單講佔中，係有小小政治市成份，政治市從來好難預測，而且變化好快。無錯，從市面影響嚟講，呢兩日的確係改善咗，至少政府總部可以返工，堵路情況只係限於原有地方，本來一度曾影響嘅龍和道都保持暢順，令人感覺好番啲。
不過，危機係咪就咁過去呢？暫時仲未敢講。首先，堵路人群減少，好可能同回復上班有關，真正情況要再觀察多兩日，特別係周六、周日，睇吓屆時人群會唔會多番；另一個因素係班學生仔同政府開會，結果開成點。
家開會都話要籌備幾日，好似好大陣仗，但講真睇嚟睇去真係睇唔到政府可以讓啲咩，咁唔通班學生仔咁順攤自動收工？就算係咁，喺街上班佔中人士又肯唔肯聽先？
記得數年前有班人效法佔領華爾街，走去霸咗匯豐總行地下，結果上完法庭搵埋執達吏，搞咗成年先清到場，特區政府係咪可以畀咁長時間去處理呢？喺呢啲問題未有答案前，佔中都未肯定會平安落幕喎。
個市趁佔中靜咗少少反彈吓，唔多唔少係炒吓滬港通概念。本來，滬港通喺今月底通車已經無乜懸念，可惜埋門一腳爆單佔中出嚟，搞到主事諸公至今都唔敢公佈開通日期。雖然係咁，但咁大單嘢如果唔炒吓真係幾可惜，所以政治無事無幹，都會有啲錢出嚟炒炒呢個概念，見到港匯強番啲，估計係一些資金回流炒吓。
昨日恒指反彈，但爭持仍然明顯，午後推高港股最多升202點，高見23517點，但之後大市回軟，尾市23400點上爭持。恒生指數收報23422點，升107點；國企指數收報10469點，升59點，成交跌到只有686億元，反映好多人都唔敢大手入市。
轉炒冷門板塊
個市上落幅度唔大，巨股唔係咁易搵食，故此寧願向冷門啲嘅板塊落手，近排當炒的軍工股繼續標青，習近平作風硬朗，市場諗未來國家安全戰略升級、國防軍費開支增長以及預計四中全會推政策對軍工股有利，相關股份落鑊熱炒。
中航工業(232) 再飆12.9%，造0.96元；航天控股(031) 揚6.9%，報1.24元；中國航天萬源(1185) 都漲3%。另外，國務院昨推12項重點工程扶持物流業，推動物流股急升。
市場近日興打新，上個星期跌市掛牌的中廣核美亞(1811) 升咗兩成幾，不少散戶開心晒，由於個市咁波動，大家一擁而上打吓新股，齊齊分攤風險，搵啲嘢搞吓醫手痕。
跟住招股4隻新股孖展都唔錯，截咗飛嘅三和建築(3822) 傳超購600倍。由盈信(015) 分拆的屋宇設備工程服務商雅駿控股(1462) 之前都已經話爆咗「孖展」。此外，以「開奶茶」等產品聞名的衍生集團(6893) 超購倍數應該都好爆。集資額28億元的內地純晶圓代工廠華虹半導體(1347) 市值較大，反應相信就未必有其他細細粒股仔咁刺激！
講到升得離譜，合一投資(913) 1送4紅股除淨，股價狂升0.19元或1.46倍，收報0.32元。該公司主要業務為炒嘢，業務三更窮、五窮富，股民上車前最緊要睇真！
陸羽仁
金融High Tea 舊文
