尋找好股
2014年10月30日
本地因素缺乏變化，美股再升，重上萬七點，帶動港股再彈，午後內地造好，大市繼續夾上，10月份先殺好友，回馬槍又殺淡友一浸。
恒指高開183點後，升幅一度擴大逾300點，全日最高見23855點，最終保持升市動力，全日收升299點，收報23819點，逼近百天線(23899點)。港股連升兩日累漲2.9%或676點，主板成交升至796億元。國指同樣報捷升175點，報10724點。
內險股績後續彈上
中資金融股持續上揚，內險經營環境好過內銀，績後表現續靚仔。中國平安(2318) 及中國人壽(2628) 績後表現搶眼，中國平安首三季多賺35.8%，股價昨續揚2.87%，報62.7元。而中國人壽首三季純利按年升16.3%，亦升2.24%，報22.85元。
永利澳門(1128) 第三季少賺8.2%，期內營收總額約為9.42億美元，按年減少5.55%，惟股價仍揚4.86%，報28.05元。
其他濠賭股亦見追捧，銀娛(027) 收報50.7元，升6.29%，金沙(1928) 亦漲5.03%，報46.95元，兩股成為升幅最大的恒指成份股。
鱷魚恤(122) 公佈業績，業績相當唔靚仔，公司公佈截至7月31日止年度業績，全年純利1.06億元，按年跌55%，每股盈利11.33仙，不派息。
除咗零售環境唔好，表現咁差仲令人覺得佢有少少自殘味道。早排，股壇長毛披露自己入咗唔少貨，搞到股價即刻有反應，家間公司整個咁樣嘅業績，係咪有人想發放訊息，呢塊肥豬肉狀嘅物體唔係咁易食㗎！人哋出咗招，跟住睇下股壇長毛點還招嘞。
呢個星期初，我分析過油價低迷的底蘊，有中環茶友笑口騎騎問，油價軟弱，咁你有無尋找低油價受惠股的故事呢？你好似幾睇好航空股？
油價跌改變大氣候
茶友咁問，擺明想收吓料，我就答佢，自己分析國泰(293) 都係睇中長線基本條件啫。國泰營運其實幾透明，主要睇幾樣嘢，上線睇營運收入，下線睇成本。聽做國泰高層的老友講，公司生意幾唔錯，日本、歐洲主要市場客運都好旺，貨運持續改善，呢期仲有iPhone 6赴運刺激，呢啲數據公司已定期公佈咗。
成本因素來看，油價回軟好明顯係利好，幫到公司改善成本。照牌面睇，航空業務上線漲、下線落，利錢照計深咗好多。
當然，生意好係咪代表股價即刻升就唔敢講，因為股價起跌，往往受市場情緒主宰。好似國泰，因為過去十年，佢盈利上落好大，有時仲影響埋派息，咁唔多唔少都會影響估值，以現價14.42元，市盈率22倍，未來有可能顯著調低，不過息率1.5厘，以佢往績就低咗小小。
短期仲有伊波拉疫情同埋臨近聖誕新年旺季，員工會同公司商討加人工，都會影響市場對呢隻股嘅情緒。不過，買股如果有業績打底，點都叫做有險可守，夜晚瞓得着覺囉。
我仲想講係，油價下跌，對股市大氣候有一定影響，由宏觀利息，到個別公司盈利都會有變化。
基本原則係產油公司是受害者，用油公司係受惠者，航空、航運及造紙都應該得益，不過呢個係成本因素，仲要睇埋公司生意得唔得，跟住呢條線索，就有機會搵到績優好股嘞！
陸羽仁
金融High Tea 舊文
