港交所殺人局
2014年11月21日
幻想美麗、現實殘酷，用嚟形容滬港通都幾合適，萬眾期待佢開通，用港交所(338) 行政總裁李小加用語，聽到堤壩「咯咯」響，就估遲早決堤，終於真係等到堤壩冧咗，點知嚟嘅唔係萬馬奔騰嘅大水，而係涓涓細流，嗰種無癮法呢，真係唔係幾想講。
連跌四日無得走
滬港通啟動進入第四天，成交續縮，通過計劃成交的股票金額只有24.72億元人民幣。截至昨午滬股收市，滬股通全日餘額為107.24億元，僅使用了額度約17%。
陸羽仁唔想見淡唱淡，呢啲措施好多時開始唔係咁旺，但唔擔保日後遇着A股或港股有得炒，資金流唔會旺起上嚟，即係好似超級公路開通，初期少啲車行唔出奇，總之基建先行，唔可以即刻就有收成。
不過，唔係個個都咁厚道，好似大行里昂最新報告將滬港通稱為「幽靈列車」，話措施北上交易首日爆額，南下交易量較最差預期更差，如果說首日表現是失敗，第二日簡直可稱得上是「侮辱」。報告話如果交易量持續，港交所盈利預測有下調壓力，維持「沽售」評級。
德銀嘅報告就指出，滬港通初期冷淡，主要和合格境內機構投資者(QDII)額度未用盡，以及部份中國投資者一早通過非正式渠道投資港股有關。該行看淡中資股，認為隨環球資金流出，國指今年底將下試9800點。
外資係咁踩，搞到港交所李老總都要出嚟做吓期望管理，佢話兩地股市通車後愈來愈淡靜，情況可能持續，因為基金近期不敢太大動作，怕影響年終的表現。佢覺得措施反應較預期冷淡，亦與全球股票市場處於下行周期有關。
李小加仲力撐滬港通是一項長期政策，不會因一時高低而特別焦慮，最重要是運行首3天暫時未有出現金融安全及交易不便等問題，投資者可以按照自己的時間表入市，市場失望只係遭到市場過度炒作。佢仲安慰大家，相信一年後將看到非常不同的局面。
頁岩氣股有炒作
李老總雖然咁講，但坐咗艇嘅股民就有唔同感受。炒股一年太久，好多人只爭朝夕。港交所在滬港開車之日早上抽上189元(唔係689)，之後連跌4日跌唔停，昨日再跌1.3%至165.8元，比高位跌12.3%，正宗一個殺人局。有網友188高位追咗，早兩日問我點，我只能叫佢走。
中國股市無力，外圍表現參差，國務院發佈能源發展戰略行動計劃，重點突破頁岩氣和煤層氣開發。頁岩氣概念股受追捧，安東油田(3337) 昨飆17%；惟宏華(00196) 發盈警，預期今年溢利大降，昨收報1.19元，瀉17%。
陸羽仁
金融High Tea 舊文
