中熱港冷
2014年11月26日
憧憬中央繼續放水，內地股市昨日繼續造好，上證指數以接近全日高位收市，報2567點，再升34點，創逾38個月新高；深證成指報8693點，升115點。兩市共成交5318億元人民幣，交投可以用澎湃嚟形容。可惜內地股市急升未能打動外地買A股或內地買港股的熱情，使用滬港通買賣的A股及港股仍是少之又少，合計全日使用約30億元人仔。
壞消息兌現可入貨
內地兩年來首度減息，係相當重大的利好消息，可惜港股升咗一日就回吐49點，人升我跌，反映本地市場氣氛仲未明顯改善，亦如我早前所講，外資未因減息全面看好H股，變成內地股市熱、香港股市相對冷。
由於內地財金政策由變緊轉向放鬆，如果經濟唔得，政府就有可能再出招，形成消息時好時淡，所以係「搖搖市」上上落落，多過「單邊市」，股民不宜過份睇好或睇淡，總之要揀時機同目標，等回吐入市，等反彈有機會就食胡。恒指昨日收報23843點，跌49點，國企指數收報10782點，跌59點，成交縮減至890億元。MSCI成份股於收市後執位，最過癮係多隻被踢出MSCI中國指數成份股反而逆市向上。保利置業(119) 升5.5%；合生元(1112) 走高3.9%；中海油化學(3983) 仲勁，飆6.3%；中聯重科(1157) 都升3.5%。呢個現象以前都試過，慢慢成為習慣，被踢出局者之前一直被人沽，走勢疲弱，到壞消息成為事實的一天，壓力減除，出現大反彈，成為壞消息入貨，以後都可以留意吓同一模式的炒作。
人和小股東喊三聲
二線股方面，人和(1387) 大折讓供股集資，股價復牌後應聲下挫，收報0.37元，瀉21%，呢隻嘢炒過籠兼狂抽水，前景難卜，股東真係喊三聲。近日零售股公佈業績，結果有好有壞，顯示市道已經由過往一片好景，變成參差。時裝商包浩斯國際(483) 公佈截至9月底止中期業績，股東應佔盈利2086萬元，按年增長30%。集團上個財政年度增長唔錯，主要係因為開發咗自己品牌的手袋，刺激業績增長，但如果無乜突破產品的公司，就要面對市道放緩的壓力。以大型奢侈品銷售商周大福(1929) 嚟睇，截至9月底止中期業績，純利26.93億元，按年減少23%，每股基本盈利26.9仙，派息13仙，低過去年同期17仙，期內收入減少22.37%至293.2億元，同店銷售下跌31.2%，內地及港澳地區的同店銷售，分別跌20%及40%。
零售股無得炒聖誕鐘
周大福認為，中港兩地經濟放緩，加上去年同期高基數影響，上半年珠寶市場下跌並非意外，下半年度有多個節慶購物熱潮，相信業務會改善，集團計劃在未來十年將零售點的數量倍增，同時致力提升電子商務模式。
周大福喺中港消費市場最熱時籌備上市，一度因為估值問題拖延招股，最後公司願意削減集資規模，終於喺市道放緩前售股。家回番轉頭睇，可以話係成功摸頂集資，掛牌後股價都在潛水地帶浮沉，今年高位去過14元水平，同昨日收市10.42元有相當距離。以周大福歷史市盈率15倍左右計，息率有3.7厘，數字上唔係貴，可惜公佈中期業績後，預測市盈率同息率都要調整過，亦解釋咗點解股價喺低位徘徊。本來呢兩個月係聖誕零售旺季，從股價睇大家似乎唔係好有興趣炒聖誕消息呢個概念。近排興炒迷你新股，印刷電路板生產供應商恩達集團(1480) 今(26日)起公開發售，招股價1.09至1.25元，集資幾千萬，相信又會吸引呢類捧場客。
陸羽仁
金融High Tea 舊文
