情陷夜中環：熱鬧
■一句「好心你著返件褸，遮住對麒麟臂啦」，竟激勵到她一年後著得落條廿四腰嘅Miss Sixty牛仔褲。 互聯網
臨近聖誕，收到《蘋果日報》副刊記者的訊息，說想訪問一些名人，了解他們會準備甚麼聖誕禮物給朋友���葉朗程是男人、香港人、甚至型人，但肯定不是名人。「我們指的名人都不是藝人，而是一些有品味、懂享受、為人認識的人。」記者朋友解釋。原來如此，但還是不想受訪，因為很怕從別人的文字看到自己，怕就怕在別人會寫得不夠好看。
記者朋友見我沒有回覆，鍥而不捨，再三追問。欣賞她的毅力，也敬重她的專業，況且沒有《蘋果》也不會有我，最後也給她打個電話，好讓她有功課交。訪問過程中，記者小姐問我會送朋友甚麼禮物、會選擇甚麼地方吃飯、會在家裏添置甚麼裝飾。因為記者朋友寫的是「Big Spender」版，所以這些問題理所當然。但其實聖誕佳節，我們在乎的，不會僅僅是這些吧。
叮噹，門鐘響起。打開門，熟悉的面孔，興奮的表情，異口同聲：「Merry Christmas！」對，我們最在乎的，at least我最在乎的，是一起過聖誕節的朋友。因為中學讀男校，所以玩得最埋最埋嗰班，肯定唔係女人。就正因為最friend嗰班係男人，所以真係冇乜送聖誕禮物畀朋友嘅經驗。唔好玩啦，送禮物呢家嘢，係男人同女人之間嘅事，亦係女人同女人之間嘅事，但肯定唔會係男人同男人之間嘅事。「喂阿強，知你鍾意曼聯，呢件波衫我揀咗好耐㗎啦，送畀你！」可能我有問題，但我真係覺得男人送嘢畀男人，so gay man！
真正好友 踩多兩腳
不過，我決定趁住今個聖誕節，基一次，把這篇文章送給我最好的一班朋友，當作是這麼多年來，給他們的第一份聖誕禮物。未歌頌我們的友誼之前，先想解釋為甚麼十個男人，九個都會重色輕友。
男人都知道，我們重色，不是因為我們重視女人，而是我們都怕了女人。如果你夠膽同女朋友講，「今個聖誕節，我會同阿成過，你自己搵節目啦」，我保證，你女朋友嬲到下個聖誕節都未嬲完。女人會小器，女人會小事化大，女人會小到你飛天，但係兄弟統統都會諒解。而葉朗程的好兄弟，除了諒解，還有一個很大的優點。
每間學校都一樣，全級百幾人，存在著很多大大小小的圈子。舊同學之中，總有一兩個是經常被「起壇」的（如果唔係讀男校，應該唔會知道乜嘢係起壇），而就算是弱勢如這些經常被起壇的受害者，也總會找到一些同樣弱勢的同學仔去做他們的朋友。由此可見，的確是物以類聚人以群分，而葉朗程一班朋友的特質，就是口臭，非常口臭。
還記得那一年，大家剛剛畢業，各有各忙的找工作。我寄出很多封求職信，有兩間公司已經reject咗我，而其他都未有回音。至於我的幾個朋友，都已經收到聘用信，兩星期內開始工作。正常的朋友，見你如此徬徨無助，應該會鼓勵你，甚至替你想辦法，但他們不是正常朋友。「唔使驚喎，你揸車咁叻，可以去揸的士喎。」其中一個朋友說。其餘朋友聽到，笑到收唔到聲。「唔係喎，葉生完全冇方向感喎，灣仔去北角都未必識，的士都未必揸到，點算呀？」又是一輪笑聲，另一位搶住答：「唔緊要，揸唔到的士，揸小巴囉，日日筲箕灣西環筲箕灣，好快揸熟㗎喇！」
可能你覺得佢哋好口賤，但其實我好受佢哋呢一套。我不是那種在失意時候會想聽安慰說話的人，太「行」嘅嘢，冇意思，浪費時間。俾佢哋咁樣踩多兩腳，我反而不敢怠慢，更要加緊努力地跟上他們。
真正為你好的朋友，會兜口兜面同你講你嘅缺點，唔會同你客氣。佢哋越唔客氣，其實就越幫到你，就好像最專業的髮型師。有啲人去剪頭髮，會有啲不切實際嘅要求，「我要剪Brad Pitt個頭」、「想好似鄭秀文咁嘅長度」、「今次染全智賢嗰隻啡色」。某啲髮型師，有求必應，個髮型啱唔啱你係其次，最緊要唔好得失你。
我個髮型師就犀利啦，是其是，非其非。「你個頭太大，唔啱Brad Pitt個頭」、「你下巴太短，剪咁短會好怪」、「你膚色太黃，染完啡色會顯得仲黃」，總之你想像唔到一個髮型師會對客講嘅說話，都可以喺佢把口走出嚟。可能佢唔係咁識做人，但髮型師和好朋友一樣，你唔係需要佢識做人，你係需要佢鬧醒你。
如果唔鬧 一世唔醒
看看周圍，你的朋友過得怎樣？他們幾多歲？四十歲？三十歲？還是二十歲？有沒有一些事，是你覺得要跟他說，但又不好意思說的？明知他的女朋友是在他身上拿著數，你有沒有勇氣跟他說：「同Amy分手啦，佢當你水魚咁劏喳，唔通貪你靚仔咩，照照塊鏡啦！」
又或者，有沒有一些朋友，做咗咁多年人，都仲係渾渾噩噩，毫無方向？你敢不敢看著他的眼睛說：「你喺度做緊乜嘢呀？你睇嚇其他人，人哋同你一齊畢業，兩年升三級嘅有，樓都買埋嘅又有，你頹夠未呀？」點呀？呢啲嘢，係唔係好難講出口？梗係難講先要你講啦，唔係乜嘢叫做好朋友？
三年前，我有個女性朋友，肥到隻豬咁，五呎兩吋高，起碼百四磅，就叫她Susan吧。身邊的朋友都替Susan擔心，但他們極其量也只是說：「喂，食少啲啦，咁肥落去唔得㗎喎。」咁樣勸佢，鬼有用咩，Susan就是一直的肥下去，直到我上年聖誕節在很多人面前跟她說：「好心你著返件褸，遮住對麒麟臂啦。」
就係咁，佢未食火雞就離開咗個party。壞消息係，佢即晚unfriend咗我；好消息係，一年後嘅今日，朋友話佢著得落一條廿四腰嘅Miss Sixty牛仔褲。
有啲人，你鬧咗佢都未必醒，但係如果你鬧都唔鬧，就肯定一世唔醒。
葉朗程
葉朗程
