中環在線：80後幫佳士得賣Hermès
13歲網上轉售賺錢 「袋齡」逾10年
■Hermès矜貴在無人知袋嘅產量，Rubinger話佢身旁嘅Sterling Silver Micro Mini Kelly（銀色袋），至今佢只見過３個，本月初佳士得以私人洽購方式，以47.5萬賣出。 許頌明攝
大家都知Hermès（愛馬仕）手袋矜貴，因有錢有面都未必買到，唔少較易買到Hermès袋嘅名媛闊太，可能私底下割愛，有價有市令國際拍賣行佳士得都做埋一份，上月秋拍首度拍賣Hermès手袋，大收旺場；而幫佳士得打理呢個手袋部門，正係一位「80後」靚仔。
黑色Birkin款風險低
負責佳士得手袋部門嘅資深副總裁林博明（Matthew Rubinger）來自美國，今年只得26歲，但喺名貴手袋二手市場有超過10年經驗。佢13歲時買一個新款手袋送畀媽媽，發現可以喺網上高價轉售，於是攞番媽媽個袋轉售圖利，從此一邊讀書，一邊四出搜羅靚袋喺網上賣，越做越成功，今年9月獲邀來港加盟佳士得。
Rubinger之所以成功，其中一個原因應該係佢識到大班愛袋之人，呢班客仲要非富則貴，「有個客喺巴黎Chanel睇袋時打電話畀我，售貨員畀佢睇來季新貨，佢有能力鍾意就買，但佢影相傳畀我睇，問我應該買邊款」。
冇他嘅，金融海嘯之後，大部份有錢人都學會精明消費，造就名貴手袋開始有二手市場，買手袋都講保值，屬於一種投資。
而Rubinger其中一項工作就係清楚客人嘅手袋收藏，「假如客人有兩個紅色手袋，肯定其中一個唔會用，我會建議拍賣放售，套現買其他款式」，佢呢個講法，其實跟基金經理替客戶調整投資組合、換馬差唔多。
對於投資新手，佢建議應該買入經典袋款，好似黑色Birkin與Kelly，咁就最穩陣，冇乜風險；買入獨特、稀有嘅袋款，屬高風險、高回報嘅投資，但佢認為比較適合本身好了解名貴手袋市場嘅人。簡言之，都係咪做羊生羊太。
講到底，手袋買嚟用嘅，佢認為大家先要諗鍾唔鍾意個袋，鍾意嘅話，再睇價錢、諗價值，若發現太貴，咁就退而求其次。佢話，其實最多客問佢，𠵱家喺名店賣嘅袋款，邊一個喺10年後最值錢，當然好難答喇！
手袋係咪全新 一睇就知
Rubinger十幾年來閱袋無數，佢嘅專業唔止係辨別手袋真偽，仲可以驗到個袋究竟有冇用過，係咪真係全新，認真神奇！
佳士得拍賣嘅手袋都有「狀況報告評級」，分為1至6級，1級係如新，2級係普通人睇落全新，3級係狀況優良，去到6級就有顯著磨損。佳士得上月拍賣過百個手袋，大部份屬於1至3級。
手袋狀況去到4至6級，好多人都睇得出，Rubinger嘅專業係分辨1至3級。佢可以透過觀察袋入面嘅微細狀況與袋外嘅金屬扣，知個袋有冇用過，即使只係將部手機放過入去個袋，佢都可以睇得出。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
