中環在線：陳家強二公子青澀仔變型男
曾經到咖啡店打工
■陳漢霖日前現身馬場即引嚟網上熱話，原來佢7年前（左圖）個樣仲好青澀㗎。 
都說名人二、三代比佢哋父母更受注目。財經事務及庫務局局長陳家強星期日帶埋兩個仔入馬場，兩位公子廿幾歲，外形俊朗，輕易成為話題，尤其係未婚嘅二公子陳漢霖（Chris），睇番佢7年前十幾歲相當青澀嘅樣，簡直係脫胎換骨！
■健吾喺facebook放咗陳家強兩位公子嘅照片，問揀Chris定David？Chris輕易成為大熱。 現職於美資投行
陳家強兩位公子令人眼前一亮，就連網絡紅人健吾噚日都喺面書問大家揀大仔陳漢唐（David）還是細仔Chris，仲有近百個回應，相信陳家強都估唔到兩個仔可以咁搶鏡。
不過大仔David今年初結咗婚，娶咗一位韓國美女，大家唔使諗㗎喇，反而細仔Chris仲有想像空間。大家都知Chris同爸爸、哥哥一樣喺芝加哥大學讀書，佢仲要跟爸爸一樣主修經濟，華華噚日就四出再八多些少關於Chris嘅料。
聞說佢幾乖仔，雖然外表似公子哥兒，但實際上幾捱得苦，有一年佢去過澳洲一個酒莊做暑期工；又曾經返嚟香港，喺咖啡連鎖店做暑期工，要佢天蒙光起身返工，企足全日沖咖啡、做粗重工夫都冇呻辛苦。照咁講，佢扮陳豪沖杯靚咖啡應該都冇乜難度喇。
Chris兩年前畢業後返港，𠵱家留港工作，喺一間美資投資銀行度做，即係同媽媽一樣做同行。
同佢接觸過嘅人都讚佢有家教，好有禮貌。陳家強2011為香港電台發表《香港家書》，封信就係寫畀Chris，叫佢放眼世界，應該都好錫呢個仔。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
